Lot ñi domo wiñokinturkey

LOT KA tañi reñma, mülekefuyngün Abraam engün Kanaan mapu mew. Kiñe antü Abraam feypifi Lot: ‘Newe mülelay mapu, ñi müleal kom taiñ kulliñ. Füreneafen, wüdayayu. Eymi amualmi kiñe püle, iñche kañpüle amuan.’

Lot adkintufi mapu. Pey kiñe doy küme trokiñ mapu nielu ko, ka alün küme kachu müley ñi kulliñ ngealu. Fey ta Jordan Trokiñ mapu mew. Feymu, wiñamtuwi tañi reñma ka ñi pu kulliñ. Puwlu, dewmapuy ñi ruka Sodoma waria mew.

Sodoma rume wedake che mülerkey. Tüfa rume lladküyewi Lot, rume küme piwkengechi wentru ngelu am. Ngünechen ka rume lladküy. Feymu, Ngünechen werkürkey epu werken kümeke püllü ñi kimelafiel Lot, Ngünechen tañi apümal Sodoma ka ti püllelelu waria Gomora, rume wedake che am.

Pu werken kümeke püllü feypifi engu Lot: ‘¡Matukelmün! ¡Nüfinge tami domo ka tami epu ñawe, ka lefaymün tüfa mew!’ Lot ka tañi reñma matukawlay, feymu lle ti werken kümeke püllü nüeyew engün ñi kuwü mew, ka nentueyew engün waria mew. Fey mew, kiñe werken kümeke püllü feypieyew: ‘¡Lefmün, tamün montual tamün mongen! Wiñokintukilmün. Lefmün fütra wingkul püle, tamün lanoal.’

Feymu Lot ka tañi epu ñawe feyentuyngün, ka leftripayngün Sodoma mew. Witrakünuwürpulayngün chew no rume, ka wiñokintulayngün. Welu, Lot ñi domo feyenturkelay. Pichi alütripalu Sodoma mew, witrakünuwi ka wiñokintuy. Feymew Lot tañi domo chadikünuwi kiñe adentun reke. ¿Eymi peafuymi adentun mu?

Kimafuyiñ tüfa kiñe küme kimeltun: Ngünechen montulafi kom pu che feyentukelu, welu feychi pu che feyentukenolu, afay ñi mongen.