Loncontucunienge ñi rupan Lot ñi domo

Lot tañi malle Abrahán engu quiñentrür mülefuingu Canaán mu. Nierpuingu fentren culliñ, com feihuelai feichi mapu mu. Feimu, Abrahán feipifi ta Lot: “Quiñentrür mülelayafuyu tüfachi mapu mu, hudahuayu. Füreneen, cheu rume amuafuimi, fei iñche cañpüle amuan”. Abrahán pengeli ñi quisutu duamuunon, ¿felei cam felelai? ¿Chem pimi?

Lot dulli quiñe ayüfalchi mapu nielu fentren co ca carü cachu. Üye mu mülenagi tañi familia engün, püllelefui ta Sodoma huaria.

Sodoma cafei püllelefui Gomorra huaria, pu Sodoma che ca pu Gomorra che femquefui fentren huesaque dungu. Fente ñi huesa chengen mu, Chau Jehová apümcafi tüfachi 2 huaria. Huelu eluhui ñi montulafiel ta Lot ca tañi pu che, feimu huercüfi 2 cüme püllü ñi feipiafiel engün: “¡Matu tripamün! ¡Tripamün tüfachi huaria mu! ¡Chau Jehová apümcayafi!”.

Huelu Lot tripafemlai. Feimu pu cümeque püllü huitratunentufi ta Lot, ca tañi domo, ca tañi 2 ñahue, femngechi lefcülen entufi engün ti huaria mu. Fei feipingeingün: “¡Matu tripange, anai! ¡Lefmaumün tamün montual! ¡Huiño adquintulayaimün! Huiño adquintulmün, layaimün”.

Puulu engün ta Zoar huaria, Chau Jehová mahunelfi cütral ca azufre Sodoma ca Gomorra. Ti 2 huaria com apümcangei. Lot tañi domo inalai tañi feipieteu Chau Jehová, huiño adquintui, fei cura chadilehuetui, quiñe chadi estatua reque felehuetui. Huelu Lot ca tañi pu ñahue femingu Chau Dios ñi feipin, feimu montuluhuingün. ¿Müna hueñancülepelai Lot tañi domo mu? Ca femngechi, ¿rume hueñancülepelai tañi pu ñahue lan mu tañi ñuque? Huelu, ¿cüme duamcülepelaingün quisuque tañi inaniefiel ñi feipin Chau Jehová?