Jakob amuy Aran mapu mew

¿KIMFIMI iney ngen tüfachi wentru nütramkamekey Jakob engün? Fey wüla alün antü ñi amuel (amulngey), Jakob pefi engu inafül rünganko (posoko) mew. Ngüneytukefuyngün ñi pu ufisa. Jakob ramtufi: ‘¿Chew müleymu?’

‘Aran mapu mew,’ pirkeyngu.

‘¿Kimfimu Laban?’, ramturkey Jakob.

‘May, kimniefiyiñ. Pefinge, tüfa küpay ñi ñawe Rakel, ka ñi chaw ñi kechan ufisa engün.’ ¿Eymi peafuymi fülkülepan Rakel?

Jakob pefilu Rakel, ka ñi pu ufisa ñi weku Laban engün, amuy ka nentuy ti kura feychi rünganko mew, ñi pütukoal ti pu ufisa. Feymu Jakob trurufi (trepetufi) Rakel ka feypifi: ‘Iñche ta müna lamngenyeeyu’. Rakel müna pürapapiwkey, ka amuy ñi ruka ka feypifi ñi chaw Laban, chem dungu ñi rupaetew.

Laban rume ayüwküley Jakob ñi mülepan ñi ruka mew. Ka Jakob feypifilu: ‘Ayün ñi nieafiel Rakel’, Laban ayüwi. Welu feypifi Jakob: ‘Eymi küdawelaen ñi mapu regle tripantu, Rakel mew’. Jakob am rume piwkeyefi Rakel, feymu lle femi tüfa. Welu akulu chi antü ñi kurengeal, ¿kimimi chem dungu rupay?

Laban elufi Jakob ñi wünen ñawe Lea ta Jakob, welukünungey Rakel. Jakob kiñewkünulu ñi dungu Laban engu, regle tripantu ka küdawelfi, Laban ka elufi Rakel ñi kurengeal. Feychi antü mu, Ngünechen eluñmakefuy pu wentru ñi nieal doy kiñe domo. Welu famülke mew, müley ñi nieal kiñe domo müten, chumngechi pengeli Biblia.