Jakob ñi fütra reñma

ADKINTUFINGE tüfachi fütra reñma. Tüfa engün Jakob ñi mari epu fotüm ngefuy. Ka niefuy pu ñawe. ¿Kimüñmafimi kay kiñeke pu yall ñi üy? Kimayiñ kiñekentu.

Lea choyüfi (llegifi) Ruben, Simeon, Levi ka Juda. Rakel pelu ñi nienon püñeñ, rume weñangküy. Feymu lle elufi ñi küdawelkeetewchi domo Bila ta Jakob, ka Bila nierkey epu pu yall Dan ka Neftali pingeyngu. Feymu ka, Lea elufi tañi küdawelkeetewchi domo Silpa ta Jakob, ka Silpa choyüfi Gad ka Aser. Af mew, Lea nierkey ka epu yall, Isakar ka Sabulon.

Rupachi tripantu mu, fey wüla (üla) Rakel nierpuy kiñe püñeñ. Üytükulelfi Jose. Fey wüla doy kimayiñ Jose mew, ngerpualu am kiñe rume falin-ngechi che. Tüfa engün ta Jakob ñi mari kiñe fotüm, choyüngey petu ñi mülen Laban, Rakel ñi chaw.

Jakob ka nierkey kiñeke ñawe, welu ti Biblia eluy ñi üy kiñe müten. Dina pingerkefuy.

Akuy chi antü, Jakob ñi elkünuafiel Laban, ka ñi amutual Kanaan. Feymu lle, trawülfi ñi fütra reñma ka ñi fütrake kechan ufisa ka kechan waka, ka fütra kamapu amutuy.

Dewma rupay antü ñi amulen Jakob ka ñi pu reñma engün Kanaan mapu mew, feymu Rakel ka püñeñi. Tüfa rupay petu amulerpulu engün. Weda dungu mew ruparkey Rakel: petu choyülu (püñeñlu) lay. Welu ti we püñeñ kümelkaley. Jakob üytufi Benjamin.

Iñchiñ ayüliyiñ taiñ tukulpayal Jakob ñi mari epu fotüm ñi üy, kom Israel trokiñ che am tuwüngey fey engün. Feymu lle, Israel ñi mari epu trokiñ reñma, üytungekey Jakob ñi mari fotüm, Jose ñi epu fotüm ka. Isaak mongerkey rume fentren tripantu, dew choyüngelu kom tüfachi pichi wentru, ka rume ayüwkülepeychi ñi nieal fentren laku. Welu peafiyiñ chem dungu mu ñi rupan ñi laku, Dina.