Jacob ca Esaú cümelcautuingu

Chau Jehová cuñiutucufi Abrahán ca Isaac. Ca femngechi, feipicünufi ta Jacob ñi cuñiutucuafiel. Jacob mülenagpui Harán mapu mu. Üye mu nierpui tañi domo, fentren pichiqueche ca fentren fillem.

Quiñe antü, Chau Jehová feipifi ta Jacob: “Huiñotuaimi cheu ñi mülequefel tami cuifiqueche yem”. Feimu Jacob eluhui ñi amual tañi pu che engün. Petu amulelu engün, quiñeque cüdaufe feipipaeyu: “Cüpalei tami peñi Esaú 400 huentru engün”. Jacob llicalefui ñi huesalcayaeteu. Feimu llellipufi ta Chau Jehová: “Füreneen, montulafen tañi peñi mu”. Ca antü Jacob huercülelfi ta Esaú quiñeque regalo: fentrenque ufisha, capüra, huaca, camello ca burro.

Feichi pun, quisulehuelu Jacob, ¡pefi quiñe cüme püllü! Com feichi pun quehuaingu. Ti cüme püllü feipieyu: “Fentecünunge, amutualu iñche”. Huelu Jacob huiñoldungui: “Femlayan, hune cümelcaen, fei hula amutuaimi”. Fei hunlu hula fentepui. Jacob allfütripalu rume, huelu eluulai ñi hueungeal.

Fei, tati cüme püllü cümelcafi ta Jacob. Femngechi, Jacob quimtucui ñi cuñiutucuaeteu Chau Jehová, fei ñi huesalcanoaeteu Esaú.

Feichi antü pefi camapu ñi cüpalen Esaú 400 huentru engün. Jacob hune tripai ñi trafyemeafiel tañi peñi. Puulu, pochongnagi Esaú tañi adquiñ mu, 7 rupa femi. Fei, Esaú lefcülen amui ñi pancoaeteu. Ngümaingu ca cümelcautuingu. Jacob ñi femün, ¿ayühulpefi mai Chau Jehová? ¿Chem pimi?

Deu rupalu tüfa, Esaú amutui tañi ruca mu, ca Jacob amulei ñi miyahun. Jacob niefui 12 fotüm: Rubén, Simeón, Leví, Judá, Dan, Neftalí, Gad, Aser, Isacar, Zabulón, José ca Benjamín. Chau Jehová adniefi ta José ñi montulafiel tañi pu che. ¿Chumngechi femi? Ngüneduamaiñ.