Jacob falin dungu elungei

Nierpulu Isaac 40 tripantu niehui Rebeca engu. Isaac rume piuqueyeniefi tañi domo. Fei nierpuingu 2 familia, gemelongeingu.

Choyüngelu engu, hune tripai Esaú, fei hula Jacob. Esaú rume ayüquefui miyahual lelfün mu, cüme cazadorngefui. Huelu Jacob doi ayüquefui ñi mülenagal ruca mu.

Cuifi mu, lan mu ti chau tañi hunen fotüm llouquefui doi mapu ca plata tañi pu peñi mu, tüfa “herencia” pingequei. Isaac ñi familia mu, ti hunen fotüm ca mülefui ñi llohual tati eldungu ñi feipifiel Chau Jehová ta Abrahán. Esaú falintulafi feichi eldungu, huelu Jacob quimniefui ñi rume falin-ngen.

Quiñe antü, Esaú com antü miyaufui lelfün mu, feimu cansalen huiñotui ruca mu. Fei feipifi ta Jacob: “¡Rume ngüñün, epe entrilen! Matu eluen pichin tami quelü iyael”. Jacob feipi: “Felei, eluayu. Huelu eimi eluaen tami herencia, feipicünuaen llemai”. Esaú huiñoldungui: “¡Duamlafiñ feichi herencia! Eimingepe. Feula duamnien tañi iyal müten”. ¿Chem pimi? ¿Quimchengepefui mai Esaú ñi femün mu tüfa? Femlai. Famentufi quiñe falin dungu re tañi elungeal iyael müten.

Isaac füchai, feula mülefui ñi cümelcayafiel tañi hunen fotüm. Huelu Rebeca quellufi ta Jacob, ti inan fotüm, ñi cümelcayaeteu tañi chau. Quimlu Esaú, rume illcui, cüpa langümfi tañi peñi. Isaac ca Rebeca ayüfuingu ñi cuñiutucuafiel ta Jacob. Feimu feipifingu ñi amual tañi huecu Labán ñi ruca mu, tüfa Rebeca ñi huentru lamngen, “üye mu mülenagaimi, tüngduamnagle hula Esaú” pingei. Jacob femi ñi feipieteu Isaac engu Rebeca, fei lefmahui ñi langümnoaeteu tañi peñi.