Epu choyün peñi kake rumeyngu

TÜFACHI epu weche wentru pefimi tüfa doy kake rumeyngu ¿fey ngey? ¿Kimimi iney pingey engu? Ti nüfafe Esaw pingerkefuy, kangelu Jacob pingerkefuy ufisakamañ (inawmenekefuy ufisa) ngefuy.

Esaw ka Jakob, Isaak engu Rebeka ñi epuntu (epu llegi) yall. Ti chaw Isaak rume ayükefuy Esaw, küme nüfafe ürke am küpalkefuy iyael tañi ruka mew, tañi reñma ñi ikeal. Welu Rebeka doy piwkeyefi Jakob, fey am doy ñom che ka ñochiduam ngey.

Petu mongelerkefuy laku Abraam, ka pelleafuyiñ tunten ñi ayüken Jacob ñi allküfiel Jewba ñi dungu. Fey mew, lay Abraam nielu pataka regle mari kechu tripantu, feytichi epuntu pichike wentru nierkefuy mari kechu tripantu.

Esaw nielu meli mari tripantu, niey epu domo Kanaan mapu tuwlu. Tüfa rume lladküy Isaak engu Rebeka, tüfachi epu domo am Jewba poyekelafingu.

Fey wüla akuy ti antü Isaak wülafilu ti kümelkan tañi wünen fotüm. Esaw lliwatuniey ñi llowngeal ti kümelkan, kidu am wünengelu. Welu Esaw dew fendefi ñi wünen fotümngeel ñi llowngeal ti kümelkan Jakob mew. Kafey, choyülu (llaglu) epu pichikeche, Ngünechen feypikünuy Jakob ñi llowngeal ti kümelkan. Feychi dungu may rupay. Isaak elufi ti kümelkan tañi fotüm Jakob. Tüfa doy lladkütufi Esaw ñi peñi Jakob.

Fey wüla Esau kimlu tüfa, doy lladküturkefi Jakob. Müna lladkürkey feymu feypi ‘langümafiñ Jakob’, pi. Kimlu tüfa Rebeka, müna weda duami. Feymu lle, feypifi Isaak ñi füta: ‘Tüngkülewelaiñ Jakob ka kurengele Kanaan domo yemele.’

Feymu lle Isaak mütrümfi ñi fotüm Jakob ka feypifi: ‘Kanaan domo yemekilnge tami kurengeal. Doy kümey tami amual Betuel tañi ruka mew, tami chedki (fücha ocha) mew, Aran mapu mew. Yemeaymi Laban tami weku ñi kiñe ñawe, fey tami kurengeal.’

Jakob feyentuy ñi chaw, ka purüm amuy ka mapu, chew ñi mülen ñi reñma Aran mapu mew.