Jefte ñi feypikünun

¿EYMI feypiyüm kiñe dungu ‘rüf feman’, welu küdawtuketufimi tami femal? Feychi dungu mu rupay tüfachi wentru mülelu adentun mu, feymu lle weñangküley. Jefte tati, kiñe llükakenochi kues Israel mew.

Jefte müley feychi antü mu pu Israel che poyewelafi engün Jewba. Ka wiño wedalkamekeyngün. Feymu lle Jewba elufi pu Amon che ñi wedalkamekeetew. Pu Israel che mütrümfingün Jewba, ka feypifi engün: ‘Yafkaleiñ eymi mu. ¡Montulmuiñ!’

Pu che müna weñangküley kom ñi wedalkakeel engün. Pengeli engün tüfa ñi wiño poyeafiel Jewba. Feymu lle Jewba ka kellueyew engün.

Fey mu tati pu che dullifingün (ngümintufingün) Jefte ñi kewayafiel, feychi pu wedake che tuwlu Amon pingechi mapu. Jefte müna ayükey Jewba ñi kelluaetew ti awkan (weychan) mu. Feymu lle feypikünufi Jewba: ‘Elueli tañi wewafiel pu Amon che mu, chi wüne tripapachi che tañi ruka mew ñi trafmeaetew, wiñomeli, iñche rüf eluaeyu.’

Jewba allküy Jefte ñi feypikünun, ka kellufi ñi wewal chi awkan. Wiñotulu Jefte, ¿eymi kimimi iney (iñi) ngen feychi wüne che ñi trafmeetew kidu? Tañi kiñen ñawe tati. ‘¡Awüngen, tañi ñawe!’, ngümay Jefte. ‘¡Müna weñangkün eluen! Welu dew feypikünufiñ Jewba, ka fewla pepilan ñi wiño witrantükuafiel ñi feypifiel Jewba.’

Kimürpulu Jefte ñi ñawe chem pi ñi chaw, ka weñangküy, elkünuafilu am ñi chaw ka ñi pu weni. Welu tuntepule ñi mongen, serfiafi Jewba, ñi fütra tolto ruka mülelu Silo mew. Fey mew feypifi ta Jefte: ‘Eymi feypikünufilmi Jewba, müley tami puwafiel tami pin dungu.’

Fey mu Jefte ñi ñawe amuy Silo mew, ka tuntepule ñi mongen serfimekefi Jewba ñi tolto ruka mew. Pu domo Israel che pemekefingün meli antü mu, fill tripantu, ka kom engün küme rupaleyngün. Pu che piwkeyefi Jefte ñi ñawe, ti üllcha domo am müna küme küdawfe ngen tañi Ngünechen Jewba mew.