KIMELTUN 4
Kiñe üllcha domo ayuwülfi ta Jewba ka tañi chaw
Jefte ¿chem dungu feypikünumekefi ta Jewba?
Tunte (chumte) küdawngefuy rume, Jefte ñi ñawe femi femngechi feypikünuel tañi chaw
¿Kimimi iney am (iñi) tachi pichi malen mülelu ti adentun mew?... Biblia mu üytungelay, welu may üytungey tañi chaw, Jefte pingelu. Welu Biblia ta feypi tüfachi üllcha domo ayüwülfi ta Jewba ka tañi chaw. ¿Ayüfuymi tami kimafiel Jefte ka tañi ñawe? Inaduamafiyiñ tüfachi nütram mu.
Jefte küme wentrungefuy ka rume (mütre) kimelelkefuy tañi ñawe Jewba ñi dungu mu. Kafey newen wentrungefuy, ka küme longkongefuy. Feymew pu israelche feypieyew: ‘¿Ayüfuymi longkoleal iñchiñ mu ta awkayal (weychayal)?’.
Jefte ngillatufi Jewba tañi kelluaetew ñi wewal ti weychan mu. Feymu feypikünufi: ‘Wewliyiñ, eluayu chi wüne tripachi che tañi ruka mew ñi trafiemeaetew (trarümeaetu), wiñomeli’. Feychi che müleafuy ñi amual Ngünechen ñi tolto ruka mew, ka müleafuy ka küdawafuy fey mu tuntepule (chumtepole) ñi mongen. ¿Chem am ta Ngünechen ñi tolto ruka? Feychi ta kiñe ruka tati pu che ñi poyeafiel ta Jewba kuyfi mu. Fey Jefte wewi. ¿Iney am wüne tripay ñi trafiemeaetew (trarümeaetu)? ¿Iney piafuymi?...
¡Tañi ñawe triparkey! Tañi kiñen ñawe tati, ka Jefte müley ñi werküafiel tañi müleal Ngünechen ñi tolto ruka mu. Feymu rume (mütre) weñangküy. Welu ngoymalayaymi (moymal-layaymi), kidu feypikünufi ta Jewba. Feymu llemay tañi ñawe feypieyew: ‘Chaw, eymi feypikünulelfimi ta Jewba, femngechi femaymi tati’.
Ti üllcha domo tañi pu weni fill tripantu witrañmakeeyew engün
Jefte ñi ñawe ka weñangküy. ¿Chumngelu (chemu)? Tüfachi üllcha domo mülele Ngünechen ñi tolto ruka mu, fütangelayay ka nielayay püñeñ no rume. Welu kidu duami ñi femal chumngechi feypikünuel tañi chaw, ka ayüwülafiel ta Jewba. Tüfachi dungu doy falintuniefi, fütangenole rume kam nienole püñeñ. Fey llemay amuy Ngünechen ñi tolto ruka mew, ka müley üyew tuntepule (chumtepole) ñi mongen.
Jefte ñi ñawe ¿ayüwülfi ta Jewba ka tañi chaw?... ¡Femi tati! Eymi ka femaymi Jefte ñi ñawe reke. Feyentulmi (müngeltulmi) ka rume (mütre) piwkeyefilmi Jewba, kidu müna ayüwküleay. Kafey tami chaw ka tami ñuke ayüwküleayngu.