David Rey ngerpuy

SAUL ka wiño ayüy ñi nüafiel David. Yeniey küla warangka doy kümeke awkafe (weychafe) ñi kintuafiel. Kimlu tüfa David, werküy pu lloftuchefe ñi peafiel chew ñi umakemum (umañkemum) Saul feychi pun (trafia) mu. Feymew, ramtufi epu ñi pu wentru: ‘¿Iney iñchiw amuayu chew ñi umaken Saul?’

‘Iñche amuan,’ pi Abisay. Abisay, Seruya ñi wentru püñeñ, David ñi lamngen. Petu umawtuley Saul ka tañi pu wentru engün, David ka Abisay ellkawkülen konpuy chew ñi umawtulen engün. Yenieñmafingu Saul ñi wayki, ka ñi metawe ko inalkülelu ñi longko püle. Iney no rume pelaeyew ka allkülaeyew, kom fey engün am fütra kon umawkülelu.

Fewla pefinge David ka Abisay. Lef tripayngu, ka mülepuyngu wechun wingkul mu. Wirarelfi ti longko pu awkafe Israel mew: ‘Abner, ¿chumngelu (chemu) ingkañpelaymi tami ngen-ngelu, tati rey? ¡Pefinge! ¿Chew müley ñi wayki, ka tañi metawe ko?’

Saul trepey. Kimtuy David ñi dungun, ka ramtufi: ‘¿Eymi no am chi David?’ ¿Peafuymi Saul ka Abner nagaltu mu?

‘May, iñche tati, tañi ñidol rey,’ llowdunguy David. David ramtueyew: ‘¿Chumngelu ayüymi tami nüafiel iñche? ¿Chem weda dungu am femün? Awem rey, tüfa tañi mülen tami wayki. Küpape kiñe che ñi yepayafiel.’

‘Wedalkan. Wedwed dungu iñche femün,’ pi ta Saul. Feymew David amutuy, ka Saul wiñotuy tañi ruka mew. Welu David feypiwi: ‘Akuay chi antü Saul langümaenew. Müley tañi lefmawal pu Filisteo che ñi mapu mew.’ Femngechi femi. David ngünenkafi chi pu filisteo, feymu ‘fewla kellungealu’ trokiwi engün.

Pichiñma antü mew, püray pu Filisteo che ñi kewayafiel Israel mew. Saul ka Jonatan lay engu, ti awkan mu. Rupalu tüfa, David rume weñangküley, ka wirintükuy kiñe tutelu ül, femngechi ülkantuy: ‘Müna weñangkülen eymi tami duam, tañi peñi, Jonatan. ¡Rumeñma piwkeyekefeyu!’

Fey wüla tüfa David wiñotuy Israel, Ebron waria mu. Üye mew müley kiñe awkan (weychan) pu wentru dullifilu (ngümintufilu) Isboset, Saul ñi fotüm, ñi rey ngeal, ka kake pu wentru ayüfuy David ñi rey ngeal. Welu af mew David ñi pu wentru wewingün. David küla mari tripantu niey rey ngerpulu. Regle rangiñ tripantu ngüneniey Ebron waria mew. Kiñeke David ñi pu fotüm choyüngelu üye mew, fey ta Amnon, Absalon ka Adonia.

Mülen antü mu, David ka tañi pu wentru amuyngün ñi nüafiel kiñe tutelu waria, Jerusalen pingelu. Joab, David ñi lamngen ñi kangelu wentru püñeñ Seruya, adniey chi kewan mu. Feymu lle David elufi ñi longkoleal pu awkafe, wewelchi mañumtun reke. Fewla David tuwi ñi ngünenietual Jerusalen waria mew.