David ca Saúl

David langümfilu ta Goliat, Saúl loncocünueyu pu hueichafe mu. David hueutripai fentren hueichan mu, fei rume quimniengequefui. Huiñotun mu David, pu domo failalen llouquefeyu ca ülcantuquefuingün: “Saúl hueufi mil caiñe, huelu David doi 10 mil caiñe hueufi”. Feimu Saúl ütrirfi David, ca cüpa langümfi.

David rume cüme dungulquefui ti arpa. Huelu quiñe rupa, petu ñi dungulmequefiel tañi allcütuaeteu, Saúl ütrüftueyu quiñe huaiqui. David püntütripai, fei ti huaiqui clafaconi pared mu. Saúl fentren rupa eluhui ñi langümafiel. Feimu David lefmahui ñi ellcahual.

Fei Saúl inantucufi ta David 3 mil huentru engün. Saúl quimlafui, huelu coni ti lolo mu cheu ñi ellcaucülen David ca tañi pu huentru. David ñochi dungun mu feipingei: “Feulaque langümafuimi ta Saúl”. Saúl ngüneduamlai rume, David catrünentuñmaeyu ñi tacun. Huelu David rume huesa duami tañi yamnofiel Chau Jehová ñi dullielchi huentru. Feimu catrütufi tañi pu huentru ñi lefcontunoafiel ta Saúl. Tripalu Saúl feichi lolo mu, David nehuentu feipifi: “Pepi langümfeyu, huelu femlan”. ¿Doi cüme troquipefeyu mai Saúl?

Femlai. Amulei ñi inantucueteu. Pun meu, David ca tañi sobrino Abisái ellcalen conpuingu cheu ñi umaucülen Saúl ca tañi pu hueichafe. Abner, elfalcülelu ñi cuñiutucuafiel ta Saúl, ca umaucülefui. Abisái feipifi David: “¡Feulaque allmalltuaiñ! Füreneen, langümafiñ”. Huelu David feipieyu: “Chau Jehová ñi cuhu mu mülei. Yeñmayafiyu tañi huaiqui ca tañi metahue, fei amutuayu”.

Fei hula, David pürai quiñe huincul mu inafülcülelu, üye mu adquintufi cheu ñi toltoucülen Saúl ca nehuentu feipi: “¡Abner! ¿Chumngelu cuñiutuculafimi ti lonco ülmen? ¿Cheu mülei ñi huaiqui ca tañi metahue?”. Saúl allcüi David ñi dungun, fei feipi: “Langümngeafun, huelu femlaimi. Eimi llemai lonco ülmencüleaimi Israel mu”. Fei Saúl huiñotui tañi ruca mu. Huelu tañi familia mu, mülefui quiñeque che üdequenofilu ta David.