Saul wünen rey Israel mew

KÜME adkintufinge Samuel wütrünakümelfi aseyte feychi wentru ñi longko mew. Fey tüfa femngekey ñi pengelal kiñe che dullingelu (ngümintungelu) ñi rey ngeal. Jewba feypifi ta Samuel ñi wütrünakümelafiel aseyte Saul ñi wente longko mu. Tüfa kiñe doy küme aseyte, kochi küme nümün ngey.

Saul rakiduami topanoalu trokiwi küme rey ngeal. Feypifi ta Samuel: ‘Iñche tuwün Benjamin trokiñche, doy pichi reñma Israel mu. ¿Chumngelu (chemu) am feypimeken “rey ngeaymi”?’ Jewba ayüfi Saul, Saul duamlay fütra falin wentru ngeal. Feymu lle dullifi (ngümintufi) ñi rey ngeal.

Welu Saul pofre (kuñifal) ngelay, ka pichi wentru no. Kiñe ülmen reñma (pu che) mu tuwi, ka müna küme ad ngey, ka fütra witran wentru ngerkey. ¡Doy niefi pu Israel che epe küla trokiñ nüfkü mu! Saul rume lemu wentru ngefuy, ka doy newen wentru ngey. Tati pu che ayüwi engün ta Jewba ñi dullifiel Saul ñi rey ngeal. Ka itrokom wiraringün: ‘¡Mongepe ta rey!’

Petu newenküleyngün Israel che ñi pu kayñe, ka amuley ñi müna wedalkamekefiel pu Israel che. Pichiñma wüla Saul rey ngelu, pu Amon che pürayngün ñi kewayafiel pu Israel che. Welu Saul trapümi fentren awkafe (weychafe), ka wewfi pu Amon che. Tati pu Israel che rume ayüwingün Saul ñi rey ngen.

Rupalen pu tripantu, ka Saul yeniefi pu Israel che wewkakünumekefi ñi pu kayñe. Saul ka niey kiñe llükakenochi fotüm, Jonatan pingey. Ka Jonatan kellufi Israel ñi wewafiel fentren awkan (weychan). Pu Filisteo che doy weda kayñetuniefi pu Israel che. Kiñe antü, tunten warangkachi Filisteo che küpay ñi kewayafiel Israel che.

Samuel feypifi ta Saul: ‘Üngümaen ñi küpayal, ka chalintükukünuafiñ Jewba.’ Welu Samuel alüñmay ñi küpan. Saul llükafi tati pu Filisteo che ñi tuwal awkan, feymu wünelkawi, ka kidu femi ti chalintükun. Fey akulu Samuel, feypifi ta Saul: ‘Feyentulafimi (müngeltulafimi) Jewba ñi piel. Jewba dulliay (ngümintuay) ka che ñi rey ngeal ka ñi ngünenieafiel Israel,’ pi Samuel.

Rupay antü, Saul ka feyentuwetulay (müngeltuwetulay). Samuel feypieyew: ‘Doy kümey ñi feyentuafiel Jewba, ta eluafiel doy kümeke ufisa. Eymi feyentunofilu Jewba am, feymu eluñmawelayaymu tami Rey ngeal Israel mew.’

Tüfa kimeltuafeiñmew kiñe küme ngülam. Feymu may pengeleiñmew ñi falin-ngen taiñ rumel (turpu) feyentuafiel Jewba. Tüfa ka pengeleiñmew kiñe küme che ngen, Saul reke, wedañma ngetuafuy. ¡Iñchiñ chumkawnorume ayükelayiñ wedañma ngerpual! ¿Feyngelay?