Israel ñi hunen lonco ülmen

Chau Jehová eli pu juez ñi adnieafiel pu Israel che, huelu ayüniefuingün quiñe lonco ülmen. Feipifingün ta Samuel: “Com pu troquiñche nieingün tañi lonco ülmen, iñchiñ ca ayünieiñ”. Samuel ayülai ñi feipingeel. Feimu, llellipufi ta Chau Jehová, fei huiñoldungueyu: “Ti pu che eimi famentulaeimu, iñche mai famentungen. Nieaingün quiñe lonco ülmen, huelu feipiayu engün ñi femal fentren dungu”. Tati pu che feipingün: “¡Fempe müten! ¡Ayünieiñ quiñe lonco ülmen!”.

Chau Jehová feipifi ta Samuel: “Tati hunen lonco ülmen Saúl pingeai”. Saúl pemefi ta Samuel Ramá huaria mu. Fei Samuel tuculeleyu aceite tañi lonco mu, femngechi pengeli ñi lonco ülmencünungen.

Samuel trahulfi pu Israel che ñi pengelelafiel tati hue lonco ülmen. Huelu Saúl ngelafui. ¿Chem rupai? Ellcaucülefui fillque fillem mu. Pengelu Saúl, entungei ca huitracünungei rangiñ tati pu che mu. Doi alüpürai com pu che mu, ayüfal huentrungefui. Samuel feipi: “¡Tüfei! ¡Chau Jehová ñi dulliel!”. Feimu tati pu che nehuentu feipingün: “¡Fürenengepe taiñ lonco ülmen!”.

Saúl allcütuquefui ta Samuel ca inaquefui Chau Jehová tañi feipin, huelu femhuelai. Quiñe rupa, Samuel feipifi ta Saúl ñi esperayaeteu, fei ñi chalintucual culliñ. Pu lonco ülmen elungequelafui femal chalintucun. Huelu alüñmalu Samuel, Saúl eluhui müten ñi femal. ¿Chumi cai Samuel? Feipieyu: “Mülefui tami inayal Chau Jehová tañi feipin, huelu femlaimi”. ¿Norümtupeafui mai Saúl tañi femmequen, fei ñi famentuhuenoal Chau Jehová tañi feipin?

Quiñe antü, Saúl hueichamefi pu Amalec che. Samuel feipieyu ñi langümafiel com pu Amalec che. Huelu Saúl langümlafi ti lonco ülmen Agag. Feimu Chau Jehová feipifi ta Samuel: “Saúl elcünueneu, inahuelai tañi feipin”. Samuel rume hueñancüi ca feipifi ta Saúl: “Inahuelaimi Chau Jehová tañi feipin, feimu lonco ülmencünuafi cangelu huentru”. Samuel eluhui ñi amutual, huelu Saúl nüñmaeyu ñi tacun, fei huichaffi. Samuel feipifi: “Ca femngechi Chau Jehová müntuñmayaimu tami lonco ülmen-ngen Israel mu”. Feimu Chau Jehová lonco ülmencünufi cangelu huentru tañi piuqueyeteu ca inanieteu tañi feipin.