Ti reyno wüday

¿EYMI kimimi chumngelu (chemu) tüfachi wentru wichafkamekefi tüfachi takun? Jewba feypieyew ñi femal tüfa. Tüfachi wentru Aiya pingey, feyta Ngünechen ñi pelon wentru. ¿Kimimi chemngen kiñe pelon wentru? Feyta kiñe che ñi wüne feypikeetew Ngünechen, chem dungu rupayay küpalechi antü mu.

Aiya tüfa petu nütramkafi ta Jeroboan. Jeroboan feyta kiñe wentru Salomon elfalkünueyew ñi koneltual ñi küdaw mu. Trafuwlu engu Aiya ka Jeroboan rüpü mew, kangey ñi femün Aiya. Entuy ñi we takun takunielu, ka wichafkafi mari epu trokiñ. Feypifi ta Jeroboan: ‘Mari trokiñ nüñmunge.’ ¿Kimimi chumngelu elufi Jeroboan mari trokiñ?

Aiya feypi: ‘Jewba müntuñmayafi Salomon ñi reyno.’ Feypifi ta Jeroboan: ‘Ngünechen eluaymu mari trokiñ reñma.’ Tüfa feypiley ta müleweay epu trokiñ reñma Reoboam, Salomon ñi fotüm, ñi ngünenieal.

Salomon rume illkuy (lladküy) allkülu Aiya ñi feypifiel Jeroboan. Küpa langümfi ta Jeroboan, welu Jeroboan lefmawi ta Egipto mew. Fey wüla, Salomon lay. Meli mari tripantu mu rey ngefuy, welu fewla ñi fotüm Reoboam rey ngerpuy. Egipto mew Jeroboan allkülu Salomon dew ñi lan, feymu wiñotuy ta Israel mew.

Reoboam küme rey ngelay. Salomon weda piwke ngefuy pu che mew, welu tañi fotüm, Reoboam, doyürpuy ñi weda piwkengen. Jeroboan ka kakelu falin-ngechi wentru engün pemefingün ta Reoboam, ka ngillatufingün tañi doy kümelkayafiel ta pu che. Welu allkülay. Doyeli ñi weda piwkengen. Feymu lle tati pu che reykünufi ta Jeroboan ñi ngünenieafiel mari trokiñ reñma (pu che), welu tati epu trokiñ reñma Benjamin ka Juda amuley ñi ngünenieetew Reoboam.

Jeroboan pilafi ñi pu che ñi amual ta Jerusalen waria mu, ñi poyeafiel Jewba ñi ngillatuwe ruka mu. Feymu lle dewmay epu milla (oro) pichike toro, ka femi ti pu che koneltulelu ti reyno mari trokiñ reñma ñi poyeafiel. Pürüm (pür) ti mapu apoy wedake che, ka kewafe che.

Ka müley fill wedake dungu ti reyno nielu epu trokiñ reñma mu. Petu ñi puwnon kechu tripantu ñi rey ngerpun Reoboam, ti rey Egipto mu küpay ñi kewatuafiel Jerusalen mu. Jewba ñi ngillatuwe ruka mu, yeñmafi fentren ñi doy falin chemkün. Feymew pichiñma mu, ti ngillatuwe ruka felewetulay chumlekefel kuyfi ellaka mu.