Hudamngei ñi ngünenieel Salomón

Salomón poyefilu Chau Jehová, pu Israel che cüme felefuingün. Huelu Salomón nierpui fentren domo ca tuhun-ngelu, fei poyefingün coilaque dios. Feimu Salomón ñochiquechi ca eluhui ñi femal. Chau Jehová rume huesa duami, fei feipi: “Tami familia ngüneniehuelayafi com Israel, hudamafiñ 2 troquiñ mu. Ti doi fütra troquiñ eluafiñ quiñe tami pu cüdaufe ñi ngünenieafiel, fei tami familia ngünenieafi cangelu doi pichi troquiñ”.

Chau Jehová doi cüme quimfalcünui tañi feipin. Salomón ñi cüdaufe, Jeroboán pingelu, ca mapu miyaufui, fei trafyemeyu Chau Dios ñi huerquen, Ahíya pingelu. Ahíya huichafcafi tañi tacun 12 troquiñ mu ca feipifi ta Jeroboán: “Chau Jehová hudamafi 2 troquiñ mu ñi ngünenieel Salomón. Tüfa mu mülei 10 troquiñ tacun, adentulei tami ngünenieafiel 10 troquiñche”. Quimlu tüfa Salomón cüpa langümfi Jeroboán. Feimu Jeroboán amui Egipto. Larpulu Salomón, tañi fotüm Rehoboam lonco ülmencünungei. “Feula cuñihun-ngehuelai. Huiñotuan Israel mu” pi Jeroboán.

Pu loncolelu Israel mu feipifingün ta Rehoboam: “Feipifilmi cümeque dungu tati pu che, rumel cüdahuelaimu engün”. Huelu Rehoboam ñi pu hueni huechengelu ngülamtueyu engün: “Mülei tami cutrancayafiel pu che. Obligayafimi ñi doi cüdahual”. Rehoboam allcütufi ñi pu hueni, cutrancafi ta che, feimu caiñetungei, ca Jeroboán elungei ñi ngünenieafiel 10 troquiñche. Feichi troquiñ Israel pingequefui. Fei ti cangelu troquiñ nielu 2 troquiñche müten Judá pingequefui ca serfiquefui ta Rehoboam. Femngechi hudamngei pu Israel che.

Rehoboam ngüneniequefui Jerusalén. Jeroboán ayülafui tañi pu che ñi poyemeafiel Chau Jehová üyeu. ¿Chumngelu cai? Llicalefui ñi elcünuaeteu tati pu che, fei ñi inayafiel ta Rehoboam. Feimu deumai 2 oro pichi culliñ ca feipifi tati pu che: “Alü camapulei Jerusalén. Amulayaimün, fau poyeafuimün tüfachi pichi culliñ”. Femngechi femi pu che, fei ca huiño püntütripaingün Chau Jehová mu.