Jesu wiñotuy wenu mapu mu

RUPAYECHI antü mu, fentren rupa Jesu pewfaluwi tañi pu inanieetew mu. Kiñe rupa, kiñe kechu pataka pe no pu inanieetew peeyew engün. Pewfaluwlu Jesu, ¿eymi kimimi chem dungu nütramkafi? Ngünechen ñi reyno mu. Jewba werküfi ta Jesu tüfachi Mapu mu ñi kimeltual tati Reyno dungu mu. Dew wiño mongeltungelu tati la mu, amuley ñi femmeken tüfa.

¿Tukulpaymi chem anta Ngünechen ñi reyno? Feyta rüf ngünenielu wenu mapu mew, ka Ngünechen dullifi (ngümintufi) ta Jesu ñi rey ngeal. ¡Chumngechi dew kimiyiñ, Jesu ileltufilu tati pu ngüñülelu, tremolfilu (mongelfilu) tati pu kutrankülelu, ka wiñomongeltuyefilu rume tati pu la, fey tüfa mu pengeli ñi müna küme rey ngeal!

Feymu lle, Jesu ngüneniele kiñe warangka tripantu wenu mapu mu, ¿chumay ti Mapu mu? Fey, kom tati Mapu kiñe küme rumel mülewe ngetuay. Ngewelayay awkan (weychan), wedake dungu, kutrantun, ka lan dungu no rume. Kimkefiyiñ rüf feleay, Ngünechen dewmafilu am ti Mapu ñi pu che ñi küme rumel mülewe mu müleam. Feymu lle dewmafi ti malaltükulechi rayen Eden pingelu. Jesu af mew, femay kom ñi ayükeel Ngünechen.

Akuy chi antü Jesu ñi wiñotual wenu mapu mu. Meli mari antü mu pewfaluwi pu inanieetew mu, ka fey engün kimi ñi mongelen. Welu petu ñi amutunon feypifi fey engün: ‘Mülewemün Jerusalen waria mew ñi llowal lif küme püllü.’ Tüfa ta Ngünechen ñi nengümkiyawkechi newen, pimuelchi kürüf reke, kelluam ñi pu inanieetew tañi femal Ngünechen ñi feypin mu. Af mew, Jesu feypifi: ‘Eymün müley tamün amul dungual kom wallon (wall) Mapu mu’.

Rupan feypifilu tüfa, rupay kiñe afmatufalchi dungu. Kidu llituy ñi pürael wenu mapu mu, chumngechi peafuymi tüfa mew. Fey mew kiñe tromü ellkaley, ka tati pu inanielu pewelafingün. Jesu amutuy wenu mapu mu, ka llituy ñi ngünenieafiel tañi pu inanieetew mülelu Mapu mu.