¿Chem gobierno küpalay Chaw Dios?

1. ¿Chem ngillatun inaduamaiñ?

FENTREN che kimniefi ti ngillatun padrenuestro pingelu. Tüfachi llellipun mu, Jesus kimeltufi tañi pu inanieetew chumngechi ngillatual. Jesus, ¿chem feypi tüfachi llellipun mu? ¿Chumngelu (chemu) petu falin-ngey tüfa famülke mu?

2. ¿Chem küla falinke dungu Jesus kimeltueiñmu ngillatual?

² Jesus feypi: “Eymün ta famngechi ngillatuaymün: ‘Taiñ Chaw Ngünechen wenu mapu mülelu, yamniengepe tami üy. Küpape tami Ngünenien. Femngepe tami feypin wenu mapu mew, ka femngechi Mapu mu[’]” (Matew 6:9, 10, TNM; papeltunge Matew 6:11-13). Jesus, ¿chumngelu kimeltueiñmu ngillatual tüfachi küla dungu? (Inaduamnge ti kimelün dungu 18).

3. ¿Chem kimürpuaiñ tüfachi chillkatun mu?

³ Dew kimürpuymi Chaw Dios ñi üy: Jewba pingey. Ka dew inaduamiyiñ chumngechi ayüniey Chaw Ngünechen ñi feleal pu che ka ti Mapu. Welu Jesus feypilu: “Küpape tami Ngünenien”, ¿chem küpa feypi? Tüfachi chillkatun mu kimürpuaiñ chem am Chaw Ngünechen ñi Ngünenien, chumay ka chumngechi femay ñi yamniengetual Chaw Dios ñi üy.

¿CHEM AM CHAW NGÜNECHEN ÑI NGÜNENIEN?

4. ¿Chem am Chaw Ngünechen ñi Ngünenien? ¿Iney Longko ülmenküley?

⁴ Jewba elkünuy kiñe gobierno wenu mapu mew. Tüfachi gobierno Chaw Ngünechen ñi Ngünenien pingey. Jesus Longko ülmenküley tüfachi gobierno mu. Feymu Biblia feypi Jesus ‘tati pu ñidol mew Ñidolküley, ka ti  pu longko ülmen mew Longko ülmenküley’ (Apokalipsi 17:14). Iney no rume doy kümelkalayafeiñmu, Jesus müten. Trawüluwle rume kom pu ngünenielu, rangiñ puwlayafuyngün Jesus ñi newen mu.

5. Chaw Ngünechen ñi gobierno, ¿chew müley? ¿Chem ngünenieafi?

⁵ Meli mari antü rupalu Jesus ñi wiñomongetun mu, wiñotuy wenu mew. Rupayechi tripantu mu, Jesus Longko ülmenkülerpuy Chaw Dios ñi Ngünenien mu (Hecho 2:33). Tüfachi gobierno müley wenu mapu mew, ka ngünenieafi ti Mapu (Apokalipsi 11:15). Feymu wenu mapu mülechi Ngünenien pingekey Biblia mu (2 Timotew 4:18).

6, 7. Jesus, ¿chumngelu doyküley chem ngüneniekelu mu rume?

⁶ Biblia kimeltukey tüfa: Jesus doyküley chem ngüneniekelu mu rume. ¿Chumngelu? Kom pu awtoridadkülelu larpukeyngün, welu Jesus femkelay. Kidu müten lawelayay (Romanu 6:9). Feymu aflayay taiñ kümelkakeetew Jesus.

⁷ Biblia feypikünuy ñi chumal Jesus tañi longko ülmen-ngen mu. Femay re nor dungu ka kutranpiwkeyecheay. Biblia feypikünuy: “Kidu nieay Jewba ñi newen, tüfa kelluaeyew ñi kimchengeal ka nieal adümuwün, kelluaeyew ñi küme rakiduamal ka ñi pepilnieal, kelluaeyew ñi nieal Chaw Dios mu küpachi kimün ka ñi yamnieafiel ta Jewba. Ayüwmayaeyew ñi yamkefiel ta Jewba. Jusgalayay re ñi pefiel müten kiñe dungu, ka norümlayay ñi allkütuel müten ti dungu. Kidu nor dungu mu jusgayafi pu fillalelu” (Isaías 11:2-4). Kom ayüafuiñ ñi nieal femngechi longko ülmen, ¿felelay am?

8. Müley che ngüneniealu Jesus engün. ¿Chumngelu kimnieiñ tüfa?

⁸ Taiñ Fütra Chaw dulli kiñeke che ñi amual wenu mapu mew, fey ñi ngünenieal Jesus engün. Feymu apostol Pablo feypifi ta Timotew: “Kiñewün mew [ngünenieaiñ, TNM] Cristo iñchiñ” (2 Timotew 2:12). Fey, ¿tunten che ngünenieay Jesus engün?

9. 1) ¿Tunten che ngünenieay Jesus engün? 2) Chaw Jewba, ¿chumül eluwi ñi dulliafiel pu 144.000?

⁹ Ti 7 chillkatun mu inaduamiyiñ apostol Juan ñi pefiel kiñe afmatun dungu. Kidu adkintuy ta Jesus, Longko ülmenkülelu wenu mapu mu, ka kompañeyew 144.000 che ngünenielu. ¿Iney engün am tüfachi 144.000 che? Tüfa engün ta manelfal kristiano, Chaw Dios dullieyew engün ñi ngünenieafiel ti Mapu Jesus engün. Lan mu, wiñomongetukeyngün wenu mew (Apokalipsi 5:10, TNM). Juan feypi tüfa engün ‘wirintukuniey tañi tol mew tati Korderu tañi üy ka kidu tañi Chaw ñi üy’, ka “yamüñmakefi Ngünechen ñi Korderu ñi kümeke dungu. Montulngey engün rangi tati pu che mew” (papeltunge Apokalipsi 14:1, 4). Ti 33 tripantu mu, Chaw Jewba eluwi ñi dulliafiel tüfachi pu che, ka fantepu petu dulliniefi.

10. Jewba dullifi Jesus ka kiñeke che ñi ngünenieal. Tüfa, ¿chumngechi pengeli Jewba taiñ piwkeyeetew?

¹⁰ Taiñ Wenu Chaw müna piwkeyeeiñmu, feymu dullifi kiñeke che ñi ngünenieal Jesus engün. Apostol Pablo feypi Jesus “taiñ kutranpiwkeyeaetew [...], kisu am ka femngechi kutrankawünngechi dungu mew rupalu iñchiñ reke” (Ebrew 4:15; 5:8). Feley, Jesus mülepalu Mapu mew rume kutrankawi, feymu küme ngünenieaeiñmew. ¿Pu 144.000 kay? Kidu engün kulpafengefuy ka kutrankefuy, iñchiñ reke, fey kutranpiwkeyeaeiñmew engün. Feymu llemay, weda duamliyiñ kam rupaliyiñ küdawün-ngechi dungu mu, maneluwaiñ taiñ kutranduamyeaetew Jesus ka pu 144.000.

¿CHUMAY CHAW NGÜNECHEN ÑI GOBIERNO?

11. ¿Chumngelu duamniengefuy ñi ngillatual: “Femngepe tami feypin wenu mapu mew”?

¹¹ Jesus kimeltufi tañi pu disipulu ñi ngillatual tüfa: “Femngepe tami feypin wenu mapu mew”. ¿Chumngelu duamniengefuy ñi ngillatual tüfa? Ti 3 chillkatun mu kimiyiñ Weküfü ñi kayñetufiel ta Chaw Dios. Welu Jewba nentufemlafi ta Weküfü ka kakelu wedake püllü wenu mu. Feymu kiñeke püllü femkelafuyngün Chaw Dios ñi pin wenu mapu mew. Ti 10 chillkatun mu doy kimaiñ Weküfü mu ka pu wedake püllü.

12. ¿Chem epu falin dungu ñi rupan pengeli Apokalipsi 12:10?

¹² Biblia pengeli ñi chumün Jesus pichi rupalu tañi longko ülmenkünungeel: kidu awkafi (weychafi) ta Weküfü (papeltunge Apokalipsi 12:7-10). Apokalipsi 12:10 pengeli epu falin dungu ñi rupan: 1) Jesukristo elungey ñi ngünenieal wenu mapu mew, ka 2) Weküfü ütrüfnakümngepay Mapu mu. Tüfachi epu dungu dew rupay, fey wüla inaduamaiñ tüfa.

13. Weküfü ngewenolu wenu mapu mew, ¿chem rupay üyew?

¹³ Weküfü ka pu wedake püllü ngewelay wenu mapu mew, feymu müna ayüwingün pu kümeke püllü. Biblia feypi: ‘¡Ayüwmün, may, wenu mapu, ka eymün müleyelu tüfey mew!’ (Apokalipsi 12:12). Fewla iney no rume kayñetuwelaeyew ta Chaw Jewba wenu mapu mew. Kom pu mülelu üyew femkeyngün Chaw Dios ñi ayükeel, feymu kiñewküleyngün.

14. Weküfü ütrüfnakümngepalu Mapu mew, ¿chem rupamekey tüfa mu?

¹⁴ Welu femngechi felelay pu che Mapu mew. Weküfü ütrüfnakümngepalu Mapu mew, “fütra lladken mew” nagpay. ‘Kimniey ñi alüñmanoal’, feymu müley fentren kutrankawün (Apokalipsi 12:12). Feley llemay, Weküfü pofo illkuley, ka kimniey ñi pichilewen tañi apümkangeal. Feymu eluwküley ñi kutrankayafiel pu che.

15. Chaw Jewba, ¿chem mongen ayüley taiñ nieal?

¹⁵ Jewba ayüley pu che ñi nieal tutengechi mongen ka turpu ñi lanoal Mapu mu, küme mülewe ngetule. Jewba ellaka mu ayüniefuy tüfa, ka fantepu mu petu ayüniey (Salmo 37:29). Fey, ¿chumay Chaw Ngünechen ñi gobierno tañi femtripayal tüfa?

16, 17. Daniel 2:44, ¿chem kimeltueiñmu Chaw Ngünechen ñi Ngünenien mew?

¹⁶ Ngüneduamaiñ ñi feypikünuel Daniel 2:44: “Feychi pu longko ülmen ñi antü mew, Ngünechen wenu mapu mülelu elkünuay kiñe ngünenien, chumkawnorume apümkangelayay. Ka tüfachi ngünenien elkünungelayay kake trokiñche mu. Atemkayafi ka apümkayafi kom tüfachi kakelu pu ngünenien, ka kidu müten chumkawnorume aflayay”. Tüfa, ¿chem kimeltueiñmu Chaw Ngünechen ñi Ngünenien mew?

¹⁷ Küla dungu. 1) Chaw Ngünechen elkünuy tañi gobierno “feychi pu longko ülmen ñi antü mew”. Feymu eluwlu ñi ngünenieal, petu mülefuy kakelu gobierno Mapu mew. 2) Chaw Ngünechen ñi Ngünenien aflayay ka welukünungelayay. Ka 3) pu che ñi gobierno awkayafi Chaw Dios ñi gobierno. Welu wewngeay engün. Fey Chaw Ngünechen ñi Ngünenien müten gobiernayafi kom ti Mapu. ¡Fey nieaiñ ti doy küme gobierno!

18. Ti awkan ñi nieal Chaw Dios ñi gobierno ka pu che ñi gobierno, ¿chem üy niey?

¹⁸ Pu gobierno epeke awkafile Chaw Ngünechen ñi Ngünenien, ¿chem rupayay? Pu wedake püllü ngünenkayafi “itrokom mapu mülechi pu longkolelu [...], femngechi ñi weychayafiel feychi antü tati itrokom pepiluwün niechi Ngünechen”. Tüfachi awkan (weychan) Armagedon pingey. Feychi mu pu che ñi gobierno weychayafingün ta Chaw Dios ñi gobierno (Apokalipsi 16:14, 16; inaduamnge ti kimelün dungu 8).

19, 20. ¿Chumngelu duamnieiñ Chaw Ngünechen ñi Ngünenien?

¹⁹ ¿Chumngelu duamnieiñ Chaw Ngünechen ñi Ngünenien? Küla dungu mew. 1) Kulpafengeiñ, feymu kutrankeiñ ka lakeiñ. Welu Chaw Ngünechen ñi gobierno mew, aflayay taiñ mongen. Feymu Biblia feypi: ‘Ngünechen rume piwkeyeniefi ta kom Mapu mew mülechi pu che, feymew wüli ñi kiñen Fotüm femngechi kom tati feyentulu kidu mew chumkawnorume ñi lanoal, welu may ñi nieal ta rumel mongen’ (Juan 3:16).

²⁰ Ka 2) Mapu mew müley fentren wedake che. Fentren engün koylatukey, ngünenkachekey ka yeniey pod mongen. Iñchiñ katrütulayafuiñ ñi femken engün. Welu Jewba femafuy. Feymu küpa elkünunole engün tañi weda mongen, Chaw Dios apümkayafi Armagedon mu (papeltunge 2 Tesalonisense 1:8). Ka 3) pu che ngünenielu wedañmangey, weda piwkengey, ka pepi küme elkünukelafi engün ti wedake dungu. Küpa kellukelafingün pu che ñi feyentuafiel ta Chaw Dios. Feymu Biblia feypi “pu che ñi ngüneniefiel kakelu pu che, fey kiñentrür ñi wedalkalerpual engün” (Eclesiastés 8:9). Kom tüfachi dungu mu fente duamnieiñ Chaw Ngünechen ñi Ngünenien.

21. Chaw Dios ñi gobierno, ¿chumngechi femay Jewba ñi feypin Mapu mu?

²¹ Rupale wüla Armagedon, Chaw Dios ñi gobierno femay kidu tañi feypin Mapu mu. ¿Chumngechi? Weküfü ka pu wedake püllü püresukünungeay warangka tripantu mu (Apokalipsi 20:1-3). Kafey rupale chi antü, iney rume kutranwelayay ka lawelayay. Ti Mapu küme mülewe ngetuay, fey kom pu che feyentufilu ta Chaw Dios nieay rumel mongen. Jesus wülkünuy ñi mongen iñchiñ mu, feymu rupayay kom tüfa (Apokalipsi 22:1-3). ¿Ka chem femay Chaw Dios ñi gobierno? Tüfa ngüneniefile ti Mapu, yamniengetuay Jewba ñi üy (inaduamnge ti kimelün dungu 19).

¿CHUMÜL ELUNGEY ÑI NGÜNENIEAL JESUS?

22. Jesus, ¿longko ülmenkünungey amutulu müten wenu mapu mu? ¿Chumngechi kimiyiñ tüfa?

²² Jesus kimeltufi tañi pu disipulu ñi femngechi ngillatual: “Küpape tami Ngünenien”. ¿Chem pengeli tüfa? Feychi mu petu küpalafuy Chaw Ngünechen ñi Ngünenien. Wüne duamniengefuy ñi elkünungeal tüfachi gobierno wenu mew, ka ñi longko ülmenkünungeal Jesus. Welu, ¿longko ülmenkünungey amutulu müten wenu mapu mu? Femlay. Pichi rupalu Jesus ñi wiñomongetun, Pedro ka Pablo küme pengelingu tüfa. Feypingu Jesus mu ñi femtripan Salmo 110:1. Tüfa mew Jewba feypi: ‘Anüpange iñche tañi man püle, kom tukufili tami pu kayñe miñche tami namun mew’ (Hecho 2:32-35; Ebrew 10:12, 13). Feley llemay, rupay fentren tripantu ñi longko ülmenkünungeal Jesus.

23. 1) ¿Chumül elungey ñi ngünenieal Jesus? 2) ¿Chem inaduamaiñ küpalechi chillkatun mu?

²³ Fentren tripantu petu ñi akunon 1914, kiñeke kümeke kristiano ngüneduamingün tüfa: feychi tripantu mu ñi femtripayal fillke dungu feypilu Biblia. Ka femngechi rupay. Feychi tripantu ka fantepu doyelküley ti weychan, awkan, filla dungu ka kutran. Kafey Jesus elungey ñi ngünenieal 1914 tripantu mu (Salmo 110:2). Pichi rupalu, Weküfü ütrüfnakümngepay Mapu mu, ka kimniey “ñi alüñmanoael” (Apokalipsi 12:12). Fey pichilewey tañi rakümtukungeal. Küpalechi chillkatun mu inaduamaiñ fillke dungu pengelkelu tüfa. Ka inaduamaiñ müchay müten ñi femngeal Chaw Dios ñi ayünieel Mapu mu (inaduamnge ti kimelün dungu 20).