Ti rüf dungu Chau Dios ñi Gobierno meu

Jesús feipifi tañi pu discipulo: “Eimün femngechi mülei tamün llellipual: ‘Taiñ Chau huenu mülelu, rume yamniengepe tami üi. Cüpape tami ngünenietual mapu [tami Gobierno]. Chumngechi ‘ñi femngequen tami ayüqueel huenu meu, ca femngechi femngepe mapu mu’” (Mateo 6:9, 10). ¿Chem am tüfachi Gobierno? Famülque mu, ¿chumngechi fürenemequeiñmu? ¿Chumngelu mülei taiñ ngillatual tüfachi Gobierno meu? Ngüneduamnge tüfa.

Jesús ngünenieai Chau Dios ñi Gobierno meu.

Lucas 1:31-33: “Jesús üituculelafimi. Falin huentrungeai, tati Doi Alüpüralelu ñi Fotüm pingeai. Chau Ngünechen Jehová lonco ülmencünuafi tañi chau David reque. Fei rumel ngünenieafi Jacob tañi cüpanche. Aflayai tañi ngünenieel [tañi gobierno]”.

Jesús quimeltuchequei ñi chumal Chau Dios ñi Gobierno.

Mateo 9:35: “Jesús miyaupui com huaria ca lof püle. Fei quimeltuyahulquefi pu che ñi ngillatuhue ruca mu, amuldungui ti cüme dungu Chau Dios ñi ngünenietual mapu [Chau Dios ñi gobierno] ca tremoltufi fillque cutran”.

Jesús quimelelfi tañi pu discipulo chem ñi rupayal petu ñi acunon Chau Dios ñi Gobierno.

Mateo 24:7: “Quiñe troquiñche hueichayafi cangelu troquiñche, ca quiñe gobierno hueichayafi cangelu gobierno. Cafei fill püle müleai ta filla ca fütraque nüyün”.

Jesús ñi pu inanieteu quimeltuchequei Chau Dios tañi Gobierno mu.

Mateo 24:14: “Ca tati cümeque dungu Chau Dios ñi ngünenietual ta mapu [Chau Dios ñi Gobierno] amuldungungeai huall mapu püle, femngechi com troquiñche ñi quimal engün. Fei hula afai mapu meu müleyechi dungu”.

Tami quimafel Chau Dios tañi Gobierno mu

¿Cheu mülei? Huenu mu Chau Dios elcünui tüfachi Gobierno (DANIEL 2:44; MATEO 4:17).

¿Chumai? Chau Dios tañi Gobierno quiñe cüme mülehue cünutuafi tüfachi mapu. Fei com pu che cüme feleai, turpu cutranhuelayai ca lahuelayai (SALMO 37:11, 29).

¿Inei engün ngünenieai? Chau Ngünechen dullifi ta Jesús ñi loncoleal tüfachi Gobierno meu. Cafei dullifi 144.000 che ñi trür ngünenieal Jesús engün huenu meu (LUCAS 1:30-33; 12:32; APOCALIPSIS 14:1, 3).

¿Inei engün fürenengeai? Fentren che ngünenieai tüfachi Gobierno. Mapu mu müleaingün ca ayühunquechi eluhuaingün tañi ngünenieaeteu Jesús, ti Lonco Ülmen. Cafei inanieaingün com ñi feipiel quisu (MATEO 7:21).

¿Chumngelu Jesús doi pepiluucülei ñi ngünenieafiel ti mapu?

Miyaupalu mapu mu, Jesús pengeli ñi cüme piuquengen ca ñi pepiluucülen tañi ngünenieal. ¿Chumi quisu?

Jesús duamtufi tati pu pofre (LUCAS 14:13, 14).
Üdequefi huesaque dungu ñi femqueel ta che (MATEO 21:12, 13).
Jesús com ngüneniequei: lafquen cam cürüf (MARCOS 4:39).
Eluyefi iyael ta fentren che (MATEO 14:19-21).
Cutranpiuqueyefi ca tremolfi pu cutran (MATEO 8:16).
Pu la huiñomongeltufi (JUAN 11:43, 44).

Eimi, ¿chumngechi füreneafeimu Chau Dios ñi Gobierno?

Eluhulmi tami ngünenieaeteu Chau Dios, rüf ayüucüleafuimi famülque mu cütu. Tüfa ta quiñeque dungu ñi femquen tati pu che eluucülelu ñi ngünenieaeteu Chau Dios ñi Gobierno:

Eluucülequei tañi cümelcautual itrocom che engün (HEBREOS 12:14).
Pu afcadihuen-ngelu epuñpüle piuqueyeuquei ca yamnieuquei, feimu ayüucülequei ca quiñeucülequei tañi pu familia engün (EFESIOS 5:22, 23, 33).
Pu eluucülelu ñi ngünenieaeteu Chau Dios ñi Gobierno allcütuquei ñi dungu, feimu ayüduamcülequei (LUCAS 11:28).