QUIMELTUN 32
¿Chumngechi incañpengei ta Jesús?
QUIÑEQUE mu Jehová femquei afmatufalchi dungu ñi incañpeafiel pu hueche quisu pepi incañpeuquenolu. Trecayahulmi lelfün meu, ngüneduamafuimi reque chem ñi femqueel Jehová, huelu ellaca mu quimlayafuimi chem ñi rupamequen. ¿Chem dungu am chi?
Raquiduamnge tüfa: eimi trecaleimi lelfün mu perumeimi quiñe üñüm anünaglu mapu mu tami miyahun püle. Huelu feiti üñüm allfülelu quechilei, huingüdquiyaulu quiñe tañi müpü. Eimi fülpufilmi, doi püntütripamequei tati üñüm. Fei hula müpütriparumei, allfülerquelai. ¿Chem ruparquei?...
Pülle cheu ñi anüpun mahuida meu, ellcanierquei tañi pichique üñüm. Llicalefui tami peñmayafiel tañi pichique üñüm, feimu allfülfaluhui eimi tami amutual. Eimi, ¿quimnieimi inei tami incañpeafeteu chumngechi ñi femquen tüfachi üñüm?... Biblia meu trürümngequei ta Jehová quiñe ñamcu mu incañpequefilu tañi pichique üñüm (Deuteronomio 32:11, 12).
Tüfachi üñüm, ¿chumngechi cuñiutucuquefi tañi pu pichique üñüm?
Jesús, fei ta Jehová ñi doi piuqueyenieelchi Fotüm. Jesús mülelu huenu mu quiñe nehuen-ngechi püllüngequefui, tañi Chau reque, quisutu incañpeuquefui. Huelu choyüngelu mapu mu, quiñe pichiche duamnielu ñi incañpengeal.
Tañi femal Jehová ñi feipicünueteu, Jesús mülefui ñi tremal femngechi quiñe culpan-ngenochi huentrungerpual. Huelu Huecüfü cüpa langümfeyu petu ñi rupanon feichi dungu. Afmatulqueiñmu chumngechi Huecüfü cüpa langümfeyu ca chumngechi Jehová ñi incañpefiel. ¿Ayüafuimi quimal?...
Pichin rupalu ñi choyüngen Jesús, Satanás femi cheu ñi tripaquen antü alofcünui quiñe huangülen quechilelu. Pu huentru ngüneduamquefilu tati pu huangülen, pu astrologo pingequelu, inaquefingün tati huangülen puhualu Jerusalén huaria. Fei mu ramtuingün “¿Cheu am choyüngealu ti judio reyngealu?”. Fei ramtufingün quiñeque huentru quimün nielu chem ñi feipin ta Biblia, feimu huiñoldungueyu engün: “Belén pingechi huaria” ñi choyüngeal (Mateo 2:1-6).
Huiñotulu pu astrologo tañi pemefiel Jesús, ¿chem ngüfetufi Jehová ñi montulafiel ñi mongen ti pichi huentru?
Feichi mu tati rey Herodes mülelu Jerusalén mapu mu, quimi ñi choyüngen ta Jesús Belén huaria mu, feipifi tati pu huentru ngüneduamquelu huangülen: ‘Quintufimün ti pichiche, deu pefilmün huiñotuaimün iñche tamün feipimuafiel’. ¿Quimimi chumngelu Herodes duamfui ñi peafiel ta Jesús?... ¡Ütrirniefilu am ta Jesús, feimu cüpa langümfi!
¿Chumngechi Ngünechen incañpefi tañi Fotüm?... Pu astrologo deu pefilu ca elufilu regalo ta Jesús, quiñe peuma mu Ngünechen feipieyu engün ñi huiñotunoal cheu ñi mülen ta Herodes. Fei huiñotuingün tañi mapu mu cangelu rüpü mu, rupahuetulai Jerusalén huaria mu. Quimlu Herodes ñi deu amutun tati pu astrologo, rume illcui. Herodes duamniefulu am ñi langümafiel ta Jesús, feipi ñi langümngeal com pu pichique huentru nielu epe epu tripantu Belén huaria mu. Huelu Jesús mülehuetulai fei mu.
¿Quimimi chumngechi ñi montuluhun?... Feichi amutulu pu astrologo, Jehová feipifi ta María ñi huentru, José pingelu, ñi lefmahual engün Egipto mapu meu. Üyeu, Jesús incañpehui ñi langümnoaeteu ti huesa huentru Herodes. Quiñeque tripantu rupalu, ñi huiñotun María, José ca Jesús, Ngünechen ca huiño dungufi ta José. Quiñe peuma mu Ngünechen feipifi ta José ñi huiñotual Nazaret mapu mu, femngechi ñi montuluhual engün (Mateo 2:7-23).
¿Chumngechi huiño montui Jesús?
Feimu chumngechi ti üñüm incañpefi tañi pichique üñüm, ca femngechi Jehová incañpefi ta Jesús petu pichicalu. Cafei famülque mu, pu pichiqueche duamniei ñi incañpengeal engün. Eimi, ¿ca femngechi duamnieimi tami incañpengeal feichi pichique üñüm reque?... Ca femngechi mülei huesaque che tami huesalcayafeteu. ¿Quimfimi engün?...
Biblia feipi Huecüfü quiñe trapial reque felei ayülu taiñ lümüaeteu. Chumngechi pu trapial dulliquefi pu pichique culliñ incañpeunolu tañi lümüafiel, ca femngechi Huecüfü ñi huesaque püllü dulliquefi pu pichiqueche tañi ngünencayafiel engün (1 Pedro 5:8). Huelu Jehová doi nehuen-ngei Huecüfü mu, feimu pepi incañpeafui pu pichiqueche ñi poyequeteu. Ca femngechi pepi cümecünutuafi chem huesa dungu rume Huecüfü ñi femeteu engün.
Chumngechi peiñ ti quimeltun mari tüfachi lifru meu, ¿chem ayüi Huecüfü ca tañi pu huesaque püllü taiñ femal?... Ayüqueingün taiñ conal pod cudumuhun dungu mu Chau Jehová tañi üdequefiel. ¿Acordaimi inei engün tañi cudumuhual müten?... Quiñe huentru engu ñi domo nieucülelu müten.
Huelu mülei quiñeque huentru ca quiñeque domo ayüquelu ñi cudumafiel pichiqueche, huelu fei ünufal dungu. Feimu quiñeque pichiqueche tañi huesa femngen mu conquei huesaque huimtun mu, fei huesa pünequei tañi organo sexual. Femngechi rupai tati cuifi huaria Sodoma. Biblia feipi epu huentru pemefi ta Lot, huelu com “pichique huentru ca füchaqueche cütu” ayüfuingün ñi cudumafiel engün (Génesis 19:4, 5).
Jesús reque, eimi ca duamnieimi tami cuñiutucungeal füchaqueche cam pichiqueche cütu ayülu tami cudumaeteu. Tüfachi pu che hueniyefalqueimeu ca tami feipintucunoafiel, eluafeimu quiñeque chemcün. Huelu quisutu duamuuqueingün müten, Huecüfü ca tañi pu huesaque püllü reque. Quisutu ñi duamuhun engün cudumquefingün pichiqueche. ¡Feiti rume huesa dungu!
¿Quimimi ñi chumquen engün tañi illuluhual?... Malücañmayafeimu tami organo sexual. Inei no rume malücalayaeimu tami pene cam tami vulva, tami chau engu ñuque ca tami peñi ca lamngen no rume ñi aucantuñmayaeteu. Tüfachi yehuel eimingei müten.
Quiñe che ayüle tami malücayaeteu, ¿chem mülei tami feipial ca femal?
¿Chumngechi cuñiutucuhuafuimi?... Hunelu mu, inei rume ayüle tami nüñmayaeteu tami organo sexual, nehuentu feipiafimi: “¡Femquilnge! ¡Feipintucuaeyu!”. Feiti che culpatuelmu, coila tati. Feipintucuafimi müten, ineingele rume. Feipielmu tami ñücüfcüleal, dunguaimi müten. Feipielmu tami eluaeteu fütraque regalo cam llicalcaelmu, püntütripange feichi che mu ca feipintucuafimi müten.
Ngelai tami llicayal, huelu cuñiutucuhuaimi. Tami pu chau feipielmu “cuñiutucunge cheu tami miyauquen” feyentuafimi, femngechi pu huesaque che huesalcalayaimu.
Papeltuaiñ chumngechi tami cuñiutucuhual pu che tami huesalcayafeteu, papeltuaiñ Génesis 39:7-12; Proverbios 4:14-16; 14:15, 16; 1 Corintios 6:18; ca 2 Pedro 2:14.