CAPITULO 15

‘Yafültucufingu tati trahunche’

Huitranmangequei pu trahunche ñi doi nehuentuleal

1-3. 1) ¿Inei dulli Pablo, ca chumngechi chengefui? 2) ¿Chem quimeltuaiñmu tüfachi capitulo?

PABLO eluhui ñi ca huiño pemetuafiel fillque trahunche. Tüfa tati epuchi rupa ñi tripan tañi misionerongen. Compañeyu Timoteo, tañi hueche huentrungen quimfali tañi nehuen-ngen, 20 tripantu müten niei. Feichi mu tüfachi hueche huentru elcünui tañi mapu ñi compañafiel ta Pablo. Elcünuingu Listra ca Iconio, fei ñi pemeafiel pu trahunche fill huaria püle. Pablo quimniei ñi contuaeteu huesaque dungu ca raquiduamcülepelai: “Timoteo, ¿cüme chaftupeafi mai huesaque dungu contueliyiñmu?”.

² Timoteo ñom chengefui, feimu ¿nehue maneluucülelafui chi quisu mu? Huelu, Pablo rume maneluucülei Timoteo mu. Tañi rupan mu Pablo, cüme quimniei ñi duamnien quiñe che ñi cüme quelluaeteu femal ti cüdau, doyelchi mai hue yafcahui Bernabé engu ca hudaingu. Feimu, ¿doi raquiduamcülepelai tüfa mu? Quiñentrür Timoteo engu mülei ñi pemeafiel fillque trahunche ñi yafültucuafiel, feimu mülei ñi quiñeucüleal ca eluucüleal com piuque mu ñi femal ti cüdau.

³ Tüfachi capitulo mu, entuaiñ fentren cümeque ngülam taiñ cümelcautual caquelu che engün quiñeucülenofule rume taiñ raquiduam. Cafei peaiñ chumngelu Pablo dullifi ta Timoteo ñi quelluaeteu, ca doi cüme adümafiyiñ falinque cüdau ñi femquen pu huitran-ngepaquechi loncolelu.

“Huiñotuaiñ” ca “pemeafiyiñ tati pu peñi ca pu lamngen” (Hechos 15:36)

4. Pablo, ¿chumal ayüfui ñi ca huiño pemetuafiel fillque trahunche?

⁴ Pablo, Bernabé, Judas ca Silas quiñentrür pemefingün ti Antioquía trahunche ñi quimeltuafiel engün chem ñi femal pu cristiano tati circuncision dungu mu, fei yafültucufingün ti trahunche. Deu femlu engün, Pablo feipifi ta Bernabé: “Feula huiñotuaiñ feichi huaria cheu amuldunguiñ Chau Jehová ñi dungu. Pemeafiyiñ tati pu peñi ca pu lamngen taiñ quimal ñi chumlen engün” (Hech. 15:36). Tüfa feipilai ñi pemeafiel tañi pu hueni ñi cüme rupayal müten, doyelchi mai ayüniefuingün ñi quimeltuafiel engün chem ñi feipiel pu apostol ca pu loncolelu Jerusalén mu (Hech. 16:4). Cafei, chumngechi ñi femquen pu huitran-ngepaquechi loncolelu, Pablo rume ayüfui ñi quelluafiel pu peñi ca pu lamngen ñi doi foliluhual tañi feyentulen Chau Jehová mu (Rom. 1:11, 12). ¿Famülque mu cai? Chau Jehová tañi troquiñche, ¿chumngechi inayentuquefi ñi femün pu apostol, fei ñi yafültucuafiel pu trahunche? Peafiyiñ.

5. Tati Troquiñ Adniechequelu, ¿chumngechi quimeltuquefi ca yafültucuquefi pu trahunche?

⁵ Famülque mu, Jesucristo elfalcünufi quiñe troquiñ huentru ñi adnieafiel tañi pu trahunche, tüfa tati Troquiñ Adniechequelu pingei. Tüfa engün huercüquei carta, deumaquei itrofill publicacion ca adcünuquei trahun, fei ñi quimeltuafiel ca yafültucuafiel pu trahunche huall mapu püle. Rume ayünieingün cüme quimeltuafiel fillque trahunche, ca quimal chem ñi rupaquen caque quiñeque engün. Feimu, cüme pepicafingün fentren loncolelu ñi pemeafiel pu trahunche huall mapu püle, tüfa tati pu huitran-ngepaquechi loncolelu pingeingün.

6, 7. ¿Chem falinque cüdau femquei pu huitran-ngepaquechi loncolelu?

⁶ Famülque mu, pu huitran-ngepaquechi loncolelu inayentuniefingün ta Pablo ca pu hunenque cristiano, rume cüdauqueingün ñi quellunieafiel caque quiñeque peñi ca lamngen ñi feyentuleal Chau Jehová mu. Timoteo pemequefui fillque trahunche, fei Pablo ngülamtueyu: “Amuldungunge Chau Ngünechen ñi dungu. Amulepe tami cüdaucülen, cümelcalefule rume ta dungu cam cüdaungefule rume. Cüme quimeltuchefe reque ca ñom piuque mu norümtuchequeaimi, cüme ngülamtuchequeaimi ca cüme quimfalcünuqueafimi ti che ñi huelulcalen”. Ca feipifi: “Amuldungulenge Chau Dios ñi cümeque dungu” (2 Tim. 4:2, 5).

⁷ Pu huitran-ngepaquechi loncolelu inaniequeingün feichi ngülam, ca femngechi femquei tañi domo niefule, quiñentrür pu trahunche engün chem rume femqueingün ñi amuldungual. Rume ayüqueingün ñi quimeltucheal, fei cüme femqueingün. Tüfa rume ayühulquefi pu peñi ca pu lamngen (Rom. 12:11; 2 Tim. 2:15). Quimfali tañi piuqueyechequen, hulqueingün tañi tiempo ca tañi nehuen ñi serfiafiel pu peñi ca pu lamngen, huesa antüngeafui rume ca cuñihun-ngeafui rume, huelu ayühunquechi femqueingün tañi cüdau (Filip. 2:3, 4). Cafei entuqueingün ñi fillque hueupin Biblia mu, femngechi yafültucuquefingün pu peñi ca pu lamngen, quimeltuquefingün ca ngülamtuquefingün. Rume cümelcayaiñmu com iñchiñ raquiduamnieafiel ñi femquen pu huitran-ngepaquechi loncolelu, fei inayentuafiyiñ tañi feyentun ca maneluhun Chau Jehová mu (Heb. 13:7).

“Müna illcutuhuingu” (Hechos 15:37-41)

8. Pablo mangelfi ta Bernabé ñi huiño pemetuafiel pu trahunche, ¿fei chem pi Bernabé?

⁸ Bernabé ayüfui ñi huiño pemeafiel pu peñi ca pu lamngen chumngechi ñi feipieteu Pablo (Hech. 15:36). Deu trür cüdahuingu ca cüme quimniefuingu pu trahunche (Hech. 13:2–14:28). Ñi trür cüdahun engu “cüme dungu” pingeafui, huelu huesa dungu rupai. “Bernabé rume ayüfui ñi compañaeteu ta Juan, feiti Marcos pingelu”. Feipilafui müten, doi mai “rume ayüfui” ñi compañaeteu tañi primo Marcos (Hech. 15:37).

9. ¿Chumngelu yafcahui Pablo engu Bernabé?

⁹ Tati hunen rupa ñi tripan Pablo engu Bernabé yefingün ta Marcos. Huelu puulu engün ta Panfilia, Marcos huiñotui, fei quellulai ñi huechunentual ti amuldungun. “Feimu feula Pablo pilai ñi yeafiel” (Hech. 15:38). Ella tripafuingün müten, huelu Marcos quisucünufi ta Pablo ca Bernabé Panfilia mu ca huiñotui ta Jerusalén (Hech. 12:25; 13:13). Biblia feipilai chumngelu ñi femün, huelu ¿“cümelai ñi femün” pipelai Pablo, feimu manelfalngenolu troquipelafi?

10. ¿Chum tripai ñi yafcahun Pablo engu Bernabé?

¹⁰ Bernabé ayüfui müten ñi yeafiel ta Marcos, huelu Pablo eluulai ñi femal. Feimu, ¿chem rupai? “Müna illcutuhuingu”, fei püntuhuingu (Hech. 15:39). Bernabé amutui tañi mapu mu, Chipre pingelu, Marcos engu. Fei Pablo eluhui ñi huiño pemetuafiel pu trahunche, “dullifi ta Silas” ñi compañaeteu. “Huelu hune tati pu peñi llellipufingün ta Chau Jehová ñi cuidayafiel engu” (Hech. 15:40). Quiñentrür amuingu ta “Siria ca Cilicia mapu püle”, fei ñi “yafültucuafiel tati trahunche” (Hech. 15:41).

11. Yafcauliyiñ, ¿chem chumafuiñ taiñ cümelcautual?

¹¹ Raquiduamnge tüfa: tati Troquiñ Adniechequelu dullifi ta Pablo engu Bernabé ñi femal quiñe falin cüdau, ca Pablo conelturpui chi feichi troquiñ huentru mu rupalu chi tripantu, ca Pablo engu Bernabé cüme piuquengefuingu, feingefulu rume, feichi mu cüme ngüneulaingu. Tüfa raquiduamelqueiñmu taiñ culpan chengen com iñchiñ. Huelu, ¿afpei mai tañi cüme peñihuen-ngen engu? Femlaingu. Culpan chengefuingu rume, inayentuniefingu ta Jesús, feimu ñom chengefuingu. Cümelcautuingu, fei ca huiño cüme peñihuen-ngetuingu (Efes. 4:1-3). Cafei, rupalu quiñeque tripantu, Pablo engu Marcos quiñentrür ca huiño cüdautuingu (Col. 4:10).a

12. Pu loncolelu, ¿chumqueingün ñi inayentuafiel ta Pablo engu Bernabé?

¹² Bernabé ca Pablo illcufemquelafuingu. Doi mai, pu apostol üituculelfingün Bernabé ta José, tüfachi üi feipi “tati yafültucuchequelu”. Feimu quimfali Bernabé ñi piuqueyechequen ca quelluchequen (Hech. 4:36). Ca femngechi Pablo quimniengequefui tañi piuqueyechequen ca duamtuchequen (1 Tes. 2:7, 8). Com pu loncolelu, cafei pu huitran-ngepaquechi loncolelu, mülei ñi inayentuafiel ta Pablo engu Bernabé. Mülei ñi cüme cüdahual engün tañi ñom piuquengeal ca piuqueyeafiel tañi pu chaf loncolelu, ca com tati pu peñi ca pu lamngen pichique ufisha reque felelu (1 Ped. 5:2, 3).

“Rume cüme nütramyequefingün” (Hechos 16:1-3)

13, 14. 1) ¿Inei am ta Timoteo? Ca, ¿chumngechi quimeyu Pablo? 2) Pablo, ¿chemu falintufi ta Timoteo? 3) ¿Chem cüdau elfalcünungei Timoteo?

¹³ Ti epuchi rupa tripalu Pablo tañi misionerongen, pemefi quiñeque trahunche Galacia mu mülelu, tüfa ngüneniequefeyu Roma. Hune “puhui ta Derbe huaria. Fei hula amui ta Listra”. Üyeu mülefui “quiñe huentru inaquefilu ta Jesús, Timoteo pingelu. Fei tañi ñuque judio tuhun-ngei ca feyentuquefi ta Jesús. Huelu tañi chau Grecia che ürque” (Hech. 16:1).b

¹⁴ Pablo quimpelafi ta Timoteo ca tañi familia huitran-ngemefilu Listra 47 tripantu püle. Huelu feula huiñotulu üyeu, doi falintufi ta Timoteo. Pu peñi ca pu lamngen Listra mu fentren cümeque dungu feipiquefuingün Timoteo mu. Huelu fei ca müten no, 30 kilometro alücamapulelu rume Iconio, ti trahunche cafei “rume cüme nütramyequefingün” (Hech. 16:2). Pu loncolelu, Chau Jehová tañi nehuen mu, elfalcünufingün ta Timoteo quiñe falin cüdau: mülefui ñi quelluafiel ta Pablo ca Silas ca pemeafiel fillque trahunche (Hech. 16:3).

15, 16. Pu trahunche, ¿chumngelu feipiquefuingün cümeque dungu Timoteo mu?

¹⁵ ¿Chem cümeque dungu feipiquefui pu che Timoteo mu? ¿Tañi cüme adngen mu pemai? ¿Tañi adümuhun chi? Pu che falintuquei femngechi dungu. Tati profeta Samuel cütu juzgafi quiñe huentru tañi pefiel mu müten. Huelu Chau Jehová feipieyu: “Chem peniei ta Chau Dios, trürlai chumngechi peniei tati pu che. Tati pu che peniei chem ñi mülen tañi adquiñ mu müten, huelu Chau Jehová pei chem ñi mülen piuque mu” (1 Sam. 16:7). Huechengelu rume Timoteo, pu peñi ca pu lamngen falintueyu tañi cüme chengen mu.

¹⁶ Rupalu quiñeque tripantu, Pablo feipi cümeque dungu ñi femquen Timoteo: cüme duam mu quelluchequefui, piuqueyechequefui, quisutu duamuulai, doi mai eluucülefui ñi serfiafiel pu peñi ca pu lamngen, ca rume cüme cüdauquefui (Filip. 2:20-22). Pablo ca feipi Timoteo ñi “feyentulen rüf piuque mu” (2 Tim. 1:5).

17. Pu huechequeche, ¿chumngechi inayentuafui ta Timoteo?

¹⁷ Famülque mu, fentren huechequeche rume cüdauquei Timoteo reque ñi cüme chengeal. Quiñeque pichicalu müten cüme troquiqueyu Chau Jehová ca pu peñi ca pu lamngen (Prov. 22:1; 1 Tim. 4:15). Fei engün rüf piuque mu poyequefingün ta Chau Jehová, ngünencachequelaingün ñi cüme cristiano troquingeal (Sal. 26:4). Feimu, rume falin-ngeingün trahunche mu, Timoteo reque. Rume ayühulqueiñmu com iñchiñ hue tripalu engün ñi amuldungual, doyelchi mai fautizaulu engün feipicünufiel mu ta Jehová ñi poyeafiel com tañi mongen mu.

“Doi nehuentui ñi feyentun engün” (Hechos 16:4, 5)

18. 1) ¿Chumingu Pablo engu Timoteo? 2) ¿Chumi cai pu trahunche?

¹⁸ Pablo engu Timoteo quiñentrür cüdahuingu fentren tripantu. Pemefiel mu fillque trahunche, femingu com ñi feipieteu tati Troquiñ Adniechequelu. Biblia feipi: “Fillque huaria püle miyahuingün. Fei huldungulelfingün tati pu peñi chem ñi dulliel pu apostol ca pu loncolelu Jerusalén [mu] mülelu, femngechi inayal engün tañi feipin” (Hech. 16:4). Pu trahunche ca inafingün tañi feipingen, feimu “doi nehuentui ñi feyentun engün. Cafei fill antü conquei che ti trahunche mu” (Hech. 16:5).

19, 20. ¿Chumngelu mülei taiñ inayal ñi feipin pu huentru taiñ adnieteu?

¹⁹ Inaniefiel mu iñchiñ ñi feipin ‘pu huentru taiñ adnieteu’, Chau Jehová ca cümelcaqueiñmu (Heb. 13:17). Caletuquei chem ñi rupamequen mapu mu, feimu rume falin-ngei taiñ ngüneduamal ñi feipin ti “quim manelfal cüdaufe”, fei taiñ inayafiel (Mat. 24:45; 1 Cor. 7:29-31). Femliyiñ, doi nehuen-ngeai taiñ feyentun, ‘lifngeaiñ ca nielayaiñ huelulcan’ Chau Jehová tañi adquiñ meu (Sant. 1:27).

²⁰ Pablo, Bernabé, Marcos ca caquelu loncolelu hunen siglo mu culpan chengefuingün. Ca femngechi famülque mu com pu loncolelu, pu coneltulelu tati Troquiñ Adniechequelu cafei, culpan chengeingün (Rom. 5:12; Sant. 3:2). Huelu loncontucuaiñ: tati Troquiñ Adniechequelu manelfali. Fei engün cüme inaniequeingün Biblia ñi ngülam ca inayentuniefingün pu apostol (2 Tim. 1:13, 14). Femngechi doi nehuen-ngequetui pu trahunche ca foliluuquei tañi feyentun.

TIMOTEO NEHUENTU CÜDAHUI “ÑI AMULDUNGUNGEAL CHAU DIOS ÑI CÜMEQUE DUNGU”

Doi 11 tripantu peno rupai Timoteo ñi quelluniefiel ta Pablo. Feimu feipi: “Nielan inei no rume Timoteo reque. Raquiduamcülequei tamün duamnieelchi dungu meu. Nehuentu cüdahuiyu Timoteo iñchiu, fotümhuen reque, femngechi ñi amuldungungeal Chau Dios ñi cümeque dungu. Femün mu tüfa, pengeli ñi falin-ngen, eimün quimnieimün” (Filip. 2:20, 22). Fente ñi cüdahun, Pablo piuqueyeyu. Rume inayentufali iñchiñ mu.

Tañi chau griegongefui ca tañi ñuque judiongefui, huelu ¿Listra mu peno tremümfingu ta Timoteo? Pichicalu müten, tañi ñuque Eunice pingelu ca tañi abuelita Loida quimeltueyu Chau Dios ñi dungu (Hech. 16:1, 3; 2 Tim. 1:5; 3:14, 15). Timoteo, Eunice ca Loida cristianongerpuingün tati hunen rupa peno ñi amun Pablo ta Listra.

Rupalu chi tripantu Pablo huiñotui ta Listra, fei Timoteo niepelafui 20 tripantu ca pu peñi Listra ca Iconio huaria mu “rume cüme nütramyequefingün ta Timoteo” (Hech. 16:2). Chau Dios feipicünulelfi tañi pu huerquen quiñeque dungu Timoteo mu, feimu Pablo ca pu loncolelu elufingün ta Timoteo quiñe falin cüdau (1 Tim. 1:18; 4:14; 2 Tim. 1:6). Elungei ñi compañafiel ta Pablo tañi misionerongen mu. Fei elcünui tañi ruca ca circuncidangei ñi cüme llohuaeteu pu judio tañi amuldunguafiel (Hech. 16:3).

Fill mapu mu miyahui Timoteo. Compañfi ta Pablo ca Silas ñi amuldungual Filipos mu ca Silas engu amui ta Berea. Fei hula quisu amui Tesalónica. Üyeu ti trahunche maneluucülequefui Chau Dios mu ca piuqueyechequefui rupan mu rume huesaque dungu. Feichi cümeque dungu nütramelfi ta Pablo huiño peutulu engu Corinto mu (Hech. 16:6–17:14; 1 Tes. 3:2-6). Éfeso mu mülerpulu Pablo, llohui huesaque dungu Corinto trahunche mu, feimu raquiduamfui ñi huiño huercülelafiel ta Timoteo (1 Cor. 4:17). Pablo ca huercüfi Erasto engu ta Macedonia. Huelu huirintucufilu ñi carta pu Roma che, Pablo ca Timoteo quiñentrür mületuingu Corinto mu (Hech. 19:22; Rom. 16:21). Fei tüfa ta quiñeque mapu müten ñi amuldunguyahun Timoteo.

Topanoalu ti cüdau troquiupelafui Timoteo, feimu Pablo feipieyu: “Eluulayaimi tami illamcangeal tami hueche huentrungen mu” (1 Tim. 4:12). Pablo rume maneluuquefui Timoteo mu, feimu huercüfi ñi quellumeafiel quiñe trahunche fütraque dungu mu rupamequefulu, feipifi: “Catrütuafimi quiñeque che ñi quimeltunoal caque feyentun” (1 Tim. 1:3). Cafei elufi autoridad ñi feipial inei ñi loncolelungeal ca inei ñi siervo ministerialngeal (1 Tim. 5:22).

Tañi cüme chengen mu Timoteo, Pablo rume piuqueyerpueyu. Rume cüme hueniyehuingu, doyelchi mai, quiñe fotüm reque troquifi. Feimu feipifi ñi raquiduamtucuniefiel tañi ngülam, rume ayüniefui ñi huiño petuafiel ca llellipuquefui tañi duam mu. Timoteo niequefui quiñe cutran, feimu Pablo feipifi quiñe cüme dungu ñi femafel tañi cümelcaleal. Raquiduamcülequefui tañi cümelcaleal tañi hueni (1 Tim. 5:23; 2 Tim. 1:3, 4).

Tati hunen rupa presungelu Pablo Roma mu, Timoteo compañeyu. Cafei Biblia pengeli Timoteo ca presulefui quiñe rupa (Filem. 1; Heb. 13:23). Pablo ca Timoteo rume cüme hueniyehuingu. Feimu llemai, Pablo ngüneduamlu ñi pichilehuen ñi mongen, feipifi ta Timoteo: ‘Rume yafüluunge, matu pepaen’ (2 Tim. 4:6-9). ¿Yochi acupei mai Timoteo ñi peafiel tañi saquin hueni? Quimlaiñ, Biblia feipilai.

MARCOS ELFALCÜNUNGEI FALINQUE CÜDAU

Juan Marcos ca pingequefui Marcos. ¿Fei peno, presuntucungelu Jesús, “epe triltrangcülen” lefmahui? (Mar. 14:51, 52). Marcos ñi lifru müten feipi ñi rupan feichi dungu, feimu “Marcos feita feichi huentru” piafuiñ. Tüfa ca raquiduamelqueiñmu Marcos ñi miyahun Jesús engu quiñeque rupa.

Rupalu 11 tripantu, Herodes Agripa eluhui ñi caiñetuafiel pu cristiano, fei “fentren che inaniefilu ta Jesús” trahuluhuingün Marcos ñi ñuque ñi ruca mu, María pingelu. Üye mu amui Pedro lifrenentungelu carcel mu (Hech. 12:12). Tüfa raquiduamelqueiñmu Marcos ñi tremün quiñe ruca mu cheu ñi trahuluuquen pu peñi ca pu lamngen. ¿Cüme quimniepelafi pu hunenque discipulo? Feimu, ¿cümeque quimeltun entupelai fei engün mu?

Marcos quiñentrür cüdahui fentren peñi engün huitran-ngemelu pu hunenque trahunche. Hune peno elfalcünungei ñi quelluafiel tañi primo Bernabé ca Pablo, huitran-ngemelu engu Antioquía, Siria mu (Hech. 12:25). Cafei, compañfi engu amulu ta Chipre ca Asia Menor. Huelu quimlaiñ chumngelu quisu huiñotui ta Jerusalén (Hech. 13:4, 13). Marcos tañi duam mu yafcahui Bernabé engu Pablo. Rupan mu tüfa, Marcos engu Bernabé amuingu ta Chipre ñi amuldungual (Hech. 15:36-39).

Huelu, 60 cam 61 tripantu, Marcos ca huiño cüdahui Pablo engu Roma mu, feimu quimfali ñi cümelcautun com engün. ¿Chumngelu quimnieiñ tüfa? Pablo tañi feipin mu. Presulelu, huirintuculelfi pu cristiano Colosas mu: “Lemoria pi ta Aristarco, quiñentrür presuleyu iñchiu. Ca lemoria pi Marcos, Bernabé tañi primo. Fei amule üyeu, cüme llohuafimün chumngechi tamün feipingeel” (Col. 4:10). Pablo ayüfui ñi huercüafiel ta Marcos ñi amual ta Colosas, quimfali llemai tañi cümelcautun.

Marcos cafei quiñentrür cüdahui Pedro engu Babilonia mu, quimlaiñ tunten mu, ¿62 puulu 64 tripantu püle peno? Chumngechi pefiyiñ capitulo 10 mu, rume cüme hueniyehuingu. Feimu Pedro feipi “tañi fotüm” ñi troquiniefiel ta Marcos (1 Ped. 5:13).

Ti epuchi rupa presulelu Pablo Roma mu, 65 tripantu püle, huirintuculelfi ta Timoteo Éfeso mu mülelu: “Cüpalelaen ta Marcos, fei quellupayaeneu tañi cüdau mu” (2 Tim. 4:11). Feipingelu müten, Marcos amufempelai ta Roma. ¡Rüf saquifalngefui Marcos! Feimu llemai, rume falintueyu Pablo, Bernabé ca Pedro.

Tati doi falin cüdau ñi elungeel Marcos: fei tañi huirintucual quiñe lifru nütramcalu Jesús mu. Marcos rume cüme feipi quiñeque dungu ñi rupan. Ñi feipial tüfa mülefui ñi peafiel, feimu quiñeque che feipiquei Pedro ñi quimeleteu chem ñi rupan, ¿femngechi rupapelai? Huelu huirintuculu tañi lifru quiñentrür mülelafui Pedro engu Babilonia mu, doi mai Roma mu peno quisu huirintucui. Femlu, raquiduampelai pu judiongenolu ñi papeltuafiel, feimu feipi fentren dungu latin quehun mu ca rulpadungui quiñeque dungu deu feipingelu hebreo quehun mu, femngechi cüdautulaingün ñi adümafiel.

a Inaduamnge ti huichulechi dungu: “Marcos elfalcünungei falinque cüdau”.

b Inaduamnge ti huichulechi dungu: “Timoteo nehuentu cüdahui ‘ñi amuldungungeal Chau Dios ñi cümeque dungu’”.