Kiñe pelon dungu petu wechurpumekey famülke mew

JESU mülelu ti Olifu pingechi wingkul mew, chew rume küme fütra adniekefuy ñi lelingeal Jerusalen ka ñi ngillatuwe ruka, fey meli ñi pu disipulu wichu nentungey ñi ramtuafiel ta Jesu ñi feypiaetew ti dungu dew feypikünulu. Ka wiño feypifi ti ngillatuwe ruka ñi apümngeal ka feypifi “ta afale ta mapu” (Matew 13:40, 49). Feymew ramtungey: ‘Chumül tañi rupayael ta feychi dungu. ¿Chem wele dungu am müleay ta ngünenietulmi ka afale ta tüfachi mapu?’ (Matew 24:3).

Jesu küme wiñoldungufi (llowdungubi) chem dungu ñi rupayal petu ñi apümngenon Jerusalen waria ka ñi ngillatuwe ruka. Welu rüfkünu ñi feypikünun doy amulerpuy, fey wüla wechurpuay kom Mapu püle. Feymew ñi kimal Jesu ngünenietule, tati pu che mülelu Mapu mew müley ñi trepeleal femngechi ñi peafiel kiñe kimfalngechi dungu: feymew fentren wedake dungu müleay kom Mapu püle feychi antü mu. Feychi kimfalngechi dungu, pengeli Jewba dew Longko Ülmenkünufilu ta Jesu ñi ngünenieal ti Mesia ñi Ngünenien mu, tüfachi Ngünenien pürüm (pür) apümafi kom tati wedake dungu ka küme elkünuafi ti tüngün kom Mapu mew. Ti dungu Jesu ñi feypikünuel pengeli ñi afal ti wedake dungu mülelu Mapu mew —ti politiko dungu, chumngechi tati pu che yeniey tañi mongen ka ti religioso— fey wüla, mületuay kiñe we Mapu.

Jesu feypi ngünenietule wenu mapu mew kom wall Mapu mu müleay weychan, ngüñün, fütrake nüyün ka fill kutran kom mapu püle. Ka ti ley dungu amuley ñi yamngenon. Ka fey ñi rüfngechi pu disipulu amuldunguayngün tati kümeke dungu Ngünechen ñi Ngünenien kom Mapu mu. Af mew, epe afle chi antü akuay ti “fütra kutrankawün”, doy fütra kutrankawün müleay taiñ mongen mu (Matew 24:21).

Ka, ¿chumngechi kimayngün tati pu kristiano ñi fülkülepan ti fütra kutrankawün? Jesu feypifi tañi pu disipulu: “Kimafimün tati anümka igera mew” (Matew 24:32). Kiñe igera petu pewfaluwi tañi tapül, ngüneduamngekey tañi fülkülepan dewma ta walüng antü. Ka famngechi kiñe antü mu rupale kom tati dungu feypikünulu Jesu, kimngeay ñi fülkülepan chi afael ti antü. Welu Jesu feypi ñi Chaw müten kimi ti antü ka ti ora ñi rupayael ti fütra kutrankawün. Feymew ngüfetufi (eypibi): “Trepeluwkülemün ta eymün ka llüwatuleaymün [...] kimnolu am eymün chumül ñi akuael feychi antü” (Marku 13:33).

(Tuwlu kapitulo 24 ka 25 Matew, kapitulo 13 Marku ka kapitulo 21 Luka ñi lifru.)