Jesu wiñomongetuy

KÜLA antü ñi lan Jesu, kiñeke domo inaniekefilu Jesu amuy ñi pemeafiel ti rüngan lolo welu nülalerkey. Nentungerkey ti fütra kura takunielu tati rüngan lolo ka wellileturkey.

Feymew pewfaluwi epu werken püllü. Kiñe feypi: “Eymün kintupefuymün ta Jesus Nasaret tuwlu [...]. Wiñomongetuy tati” (Marku 16:6). Pürüm (pür) tati pu domo lef amuyngün ñi feypial pu apostol, ka rüpü püle trafwingün Jesu engün, ka feypieyew: ‘Llükakilmün. Feypimetufimün tañi pu peñi ñi amuael engün ta Galilea, fey üyew ta peaenew engün’ (Matew 28:10).

Feychi antü wüla, epu inaniekelu Jesu tripalu engu Jerusalen ñi pual Emaw waria, kiñe wentru fülkonpay ñi amulen engu ka ramtueyew engu chem ñi nütramkameken engu. Feyta Jesu ürke, welu keñafingün iney ngen kangetulu kay ñi ad. Wiñoldungufingu (llowdungubingu) weñangkün mu, nütramkamekeyngu tañi kimeltuchefe mew, feymew ti wentru feypieyew kom dungu mülelu wirintukun Mesia mew. Feymu llemay, Jesu wechurpuy kom pelon dungu feypikünulu Mesia mew.a Inaduamlu engu ñi nütramkameken Kristo engu, fewla kiñe püllü ngetulu, feymu müten ñamfemtuy.

Tati epu inaniekelu wiñotuyngün Jerusalen mu ka amuy ñi pemeafiel tati pu apostol mülelu rakümkülechi katrüntuku ruka mu. Feymu petu nütramkamekelu engu chem dungu ñi rüpan mu, Jesu wiñopewfaluwi, fey ti pu che müna afmatuleweyngün. Ka ramtueyew: “¿Chem mew anta welulkawküley tamün rakiduam?”, ka feypifi: “Wirintukuley ñi layael tati Cristo ka ñi wiñomongetuael küla antüalu mew” (Luka 24:38, 46).

Meli mari antü mu, fentren rupa Jesu pewfaluwi. Ka kiñe rupa mew doy kechu pataka che pefingün. Feychi lelen antü pemay, elkünufilu tañi pu inaniekeetew tüfachi doy falin-ngechi (manelbalchi) küdaw: “Amumün, kom chüf mapu müleyechi pu che mew. Ka kimeltuafimün femngechi tañi kimaetew engün ka iñche ñi disipulungeael engün [...] ka kimeltuafimün tañi feyentuael (müngeltuael) engün kom iñche tamün werküwkefiel ta eymün. Iñche rumel mülean ta eymün mew, tunte afllele rume ta mapu” (Matew 28:19, 20).

Inangechi trawülu ñi pu apostol engün feypikünufi: ‘Welu akule ti lif küme püllü eymün mew, llowaymün newen [...] ka fütra kamapu amuaymün tuntepu ñi mülen ta mapu’ (Hecho 1:8). Feymew kidu eluwi ñi pürael wenu mapu mew, ka kiñe tromü mew ñamkonpuy.

(Tuwlu Matew kapitulo 28, ka Marku kapitulo 16, ka Luka kapitulo 24, ka Juan ñi lifru kapitulo 20 ka 21 ka 1 Korintio 15:5, 6.)