TROKIÑ 24

Pablo ñi karta tati pu trawünche mu

Pablo wirirlelfi tati pu kristiano ñi yafüluwal engün

TI WE trawünche kristiano nieay kiñe doy falin-ngechi küdaw ñi wechurpual Jewba ñi duam mu. Welu tati pu trawüluwkelu rupayngün fentren kayñetuwün mu ka kidu engün rume chaftufi engün wedake dungu ka kayñetuwün ponwitu ñi trawün mew. Feymew ¿Chumngechi püntütripalayngün? Tati epu mari kiñe karta mülelu Griegu Wirintukun mu yafültukufi ka elufi kümeke ngülam ñi duamtunieel engün.

Pablo wirintukuy mari meli karta llituy (küpay) Romano mu ka puwi Ebrew mew. Pablo ñi wiriel kom yeniey ti üy chuchi ñi wirilelfiel che ka trawünche. Peafiyiñ kiñeke dungu Pablo ñi feypin.

Lif mongen ka tañi chumngen. Tati pu che yafkalu engün podümngechi dungu, ñiwan, ka fütra yafkan dungu, ka wiñorakiduamtunole engün ‘konlayay Ngünechen ñi ngünenien mu’ (Galata 5:19-21; 1 Korintio 6:9-11). Ngünechen ñi pu kona chew mapu tuwle rume müley ñi kiñewküleal engün (Romanu 2:11; Efesio 4:1-6). Ka ayüwünkechi müley ñi wülkeal ka kelluafiel tañi pu kiñewkülelu kiñe mupiltun müten (2 Korintio 9:7). Ti apostol yafültukufi tati pu kristiano ñi nütramkayafiel ta Jewba kom tañi piwke mu ka feymu ngülamtufi: “Rumel [molkechi] ngillatulekeaymün” (1 Tesalonisense 5:17; 2 Tesalonisense 3:1; Filipense 4:6, 7). Welu müley ñi ngillatual mupiltun mew, ñi allkütuaetew Ngünechen (Ebrew 11:6).

Pablo ¿chem ngülamtufi tati pu reñmawen (che)? Tati pu füta müley ñi piwkeyenieafiel tañi domo chumngechi kidutu piwkeyeniewi. Ka tati pu domo kom tañi piwke mu, müley ñi yamnieafiel tañi füta. Kafey, Ngünechen ayüy kom tati pu fotüm ka ñawe ñi feyentuafiel (müngeltuabel) tañi chaw ka tañi ñuke engu (Efesio 5:22–6:4; Kolosense 3:18-21).

Mapa chew ñi wirintukun Pablo ñi pu karta

Ngünechen ñi ayükeelchi dungu mu. Moyse ñi ley dungu kuñiwtukufi ka ngüyülfi tati pu israelche petu ñi akunon Kristo, welu tati pu kristiano dew duamngewetulay ñi feyentuafiel Moyse ñi ley Dungu (Galata 3:24). Pablo ñi karta wirilelfi tati pu ebrew —kristiano judiochengelu—, Pablo feypi chem pifel ti ley dungu ka Jesu mu ñi wechurpual (tripawentual) Ngünechen ñi ayükeelchi dungu. Ka feypi tüfachi ley dungu fentren pelon dungu ngerkefuy. Kiñe dungu: ti pu kulliñ chalintukulu pengeli Jesu ñi chalintukungelu küpalechi antü mu (üyepüle mu), feymew kom taiñ yafkan wiñorakiduamtuay (Ebrew 10:1-4). Feymew lalu Kristo, ti Ley eldungu faliwetulay (Kolosense 2:13-17; Ebrew 8:13).

Wüne trawünche kristiano allkütumekeyngün Pablo ñi wirielchi karta

Pepikawkülechi pu trawünche. Tati pu wentru elfal küdaw nielu engün ti trawünche mu, müley ñi nieal küme lif mongen ka kümeke chumngen mülelu Biblia mu (1 Timotew 3:1-10, 12, 13; Tito 1:5-9). Kafey doy falin-ngey kom tati Ngünechen ñi pu kona rumel (molkechi) ñi trawüal fey ñi llowal kümeke ngülam küpalu Ngünechen mew ka welukonke ñi yafüluwael engün (1 Korintio 14:26, 31; Ebrew 10:24, 25).

Pablo wirintukulu ñi afchi karta —epu puwchi karta Timotew ngelu— feychi antü mu Pablo mülekefuy Roma waria mu püresulelu ka üngümküley (ingelküley) ñi inaramtungeal. Kiñeke kristiano müten fütra piwkekünuwingün ñi pemeaetew chew ñi püresulemüm. Feymew ti apostol kimi ñi fülkülepan chi antü ñi langümngeal, feymew wirintukuy: “Rangi weychan mew reke dew küme küdawün, dew puwkülekan reke tati kuden ñi tripalwe mew, ka lif piwke mew küme puwtuleken tañi mupiltun mew” (2 Timotew 4:7). Pichin antü mu langümngey chi. Welu tañi pu karta müna kelluniefi tati rüfngechi kristiano ñi poyeafiel ta Ngünechen ñi püntütripanoal, ka kellukeeiñmew famülke mew.

(Tuwlu Romanu, 1 Korintio, 2 Korintio, Galata, Efesio, Filipense, Kolosense, 1 Tesalonisense, 2 Tesalonisense, 1 Timotew, 2 Timotew, Tito, Filemon ka Ebrew ñi lifru.)

¿INEY AM TATI FEYPIKÜNUELCHI YOMELCHE?

Adan ka Eva yafkalu engu, Ngünechen kiñe adentun dungu mu reke feypifi ta filu: ‘Tukuan tamu kayñeyewal eymi ka tati domo engu, eymi tami yomelche [küpalelu] ka tati domo ñi yomelche engün. Kidu pünoñmayaeymew tami longko, fey eymi ünatuñmayafimi ñi rüngkoy namun’ (Génesis 3:15). Chumngechi feypiley Apokalipsi 12:9, “tiyechi fütra kuyfi filu” feyta tati Weküfü. Feymew ti Biblia fentren tripantu mew pengelafuy iney am tati yomelche (küpalelu) ñi pünoñmayafiel ñi longko ti Weküfü.

Epu warangka tripantu wüla, Adan ka Eva yafkalu engu, Jewba feypikünuy ti montulchefe tuwürkeay Abraam ñi yomelche mu (Génesis 22:17, 18). Dewma rupalu patakakechi tripantu wüla, ti apostol Pablo feypi, kiñe doy falin-ngechi yomelche, feyta Mesia, Jesu ürke (Galata 3:16). Feymew Jesu ñi lan kiñe allfeñ kangey reke “rüngkoy namun” mu, dew feypikünurkey Génesis 3:15. Welu Ngünechen wiñomongeltufi ta Jesu “ti Küme Püllü ñi mongen nielu am, feymew wiñomongetuy” (1 Pedro 3:18).

Ngünechen ka feypikünuy nierkeay 144.000 che konayngün kiñe inangechi trokiñ che ti yomelche (trawünche küpalelu) mew ka llowayngün ti feypikünuelchi Ngünenien (Galata 3:29; Apokalipsi 14:1). Feymew lale engün, wiñomongetuay ñi müleal wenu mapu mu, kiñe püllü reke ka ngünenieay Jesu engün (Romanu 8:16, 17).

Jesu ngüneniele wenu mapu mu, apümafi ti Weküfü ka tañi yomelche (küpalelu), konkülelu tati pu weküfü ka wedake che engün kellukonkülelu Satana mu (Juan 8:44; Efesio 6:12). Tañi ngünenien küpalay tüngün ka ayüwün kom tati pu che püntutripanolu ta Ngünechen mu. Af mew Jesu müten pünonakümüñmayafi ti fütra filu ñi “longko”, femngechi langümafi (Ebrew 2:14).