Chaw Ngünechen elufi kom pu che kiñe küme mülewe

EPE fill kom che allküfilu tüfachi ellaka dungu: “Feychi ngenolu chem no rume, Ngünechen dewmafi ta kallfü wenu ka mapu.” (Génesis 1:1.) Tüfachi ayüngechi dungu mew, Biblia tukulpay feyti doykülelu: Jewba pingelu, kom pepiluwün-ngelu, ka Dewmakelu ti fütra wenu ka taiñ Mapu. Ellaka feypi chumngechi Ngünechen, alün rupamekechi ti tripantu, pepikafi chi Mapu taiñ mongeleal fey mew, ka dewmakey fillke doy afmatufalchi dungu.

Jewba doy kümey ñi dewman tüfachi Mapu mew tati pu che. Dewmafi wünen wentru trufür (trumag) mapu mew, ka üytufi Adan. Ka dewmafi kidu ñi adentun mu, femngechi inayentuafuy ñi piwkeyen, ñi kimün, ka tañi kümeke chumngen. Fey elkünufi malaltukulechi rayen, Eden pingelu. Chaw Ngünechen dewmay tüfachi malaltukulechi rayen, feymew mülekefuy fentren pu anümka ka kümeke fün-ngelu.

Kiñe antü, Chaw Ngünechen pey chi wentru ñi kidulen, feymew elufi kiñe kompañ. Fey dewmafi chi wünen domo Adan ñi kadi mew, fey Eva pingefuy, ka elufi ñi kurengeal. Adan müna ayüwi nielu tüfachi domo, feymew nentuy kiñe ül, feypilelu: “¡Fey tüfake ta iñche ñi kalül (kuerpu) niey ka iñche ñi foro niey!” Ka Biblia feypi: “Feymew ta wentru elkünuay ñi chaw ka ñi ñuke fey tañi trawüael ñi kure engu, fey mür kiñe che reke müten ñi feleael” (Génesis 2:22-24; 3:20).

Ngünechen feypifi ta Adan ka Eva engu ñi feyentual epu werkün dungu. Wüne mülefuy ñi ngüneytual ka küdawal ti mapu, ka fentren pu yall nieafuyngu. Kangelu werkün dungu, fey engu iyafuyngu kom fün nielu pu anümka mülelu malaltukulechi rayen mu, welu müley tañi inoafiel feyti fün nielu ‘ti anümka wülkelu ñi kimngeael ti küme dungu ka ti weda dungu’ (Génesis 2:17). Feyentunofile engu, layafuyngu. Tüfa pengelafuyngu ñi feyentuafiel Ngünechen ñi ngünenieetew, ñi poyeal, ka ñi rume mañumküleal. Feymew tüfachi kurewen engu kom chi dungu niekefuyngu ñi feyentuleal tañi poyen Chaw Ngünechen. Dewmangey ka elungey küme rakiduam engu, feymew feypi ti Biblia: “Ngünechen ngüneduamfi itrokom ñi dewmael, fey feypi: ‘Rume [mütre] tutelkaley’” (Génesis 1:31).

(Tuwlu Génesis kapitulo 1 ka 2.)