Chau Dios deumafi ti huentru ca domo

Chau Jehová deumai quiñe adngechi jardin Edén mu. Elcünui fentren rayen, anümca ca culliñ. Fei hula, deumafi ti hunen huentru Adán pingelu. ¿Chumngechi deumafi? Deumafi ti trufür mapu meu ca cüme adentucünufi, fei pimufi tañi yu mu. ¿Quimimi cai chem rupai? ¡Ti huentru elungei mongen! Chau Jehová feipifi ta Adán ñi cuidayafiel ti mapu ca ñi üitucuafiel com pu culliñ.

Chau Jehová feipifi ta Adán quiñe falin dungu, feipifi: “Iyafuimi itrofill anümca ñi fün. Huelu mülei quiñe anümca müten, fei ilayafimi tañi fün. Ifilmi, layaimi”.

Chau Jehová feipi: “Deumayafiñ quiñe che ñi quelluafiel ta Adán”. Feimu fütra con umahuelfi ta Adán, entufi tañi cadi ñi deumalelafiel tañi domo. Eva pingefui. Adán engu Eva fei tati hunen familia. ¿Chumi Adán pefilu tañi domo? Fütra ayühun mu feipi: “¡Oh, ahuem! ¡Fei tüfa, iñche tañi cadi mu entungei!, fei Chau Jehová deumaleleneu quiñe compañ. ¡Feula mai mülei ca quiñe che iñche reque!”.

Chau Jehová feipifi ta Adán engu Eva ñi nieal fentren pichiqueche, fei ñi apolafiel com ti mapu. Ayüniefui ñi quiñentrür cüdahual engu, fei ñi ayüucüleal ca cüme adcünuafiel com ti mapu. Fei ñi ayüfalngeal fill püle, Edén reque. Huelu femtripalai tüfa. ¿Chem rupai? Cüpalechi quimeltun mu peafiyiñ.