David llükakelafuy

Llükafulmi ¿chumafuymi kay?... Tami kelluaetew amuafuymi tami chaw mu ka tami ñuke mu. Welu ka müley iney tami kelluaetew. Kidu doy newen-ngey tati pu che mu. ¿Iney (iñi) piafuymi?... May, Jewba llemay. Biblia ta nütrameleiñmew kiñe weche wentru David pingelu. Fey kimi Jewba ñi kellukeetew, feymu llükakelafuy. Inaduamafiyiñ chem tañi rupan.

Pichi wentrungelu (püchü kampungelu) David, tañi chaw ka tañi ñuke kimelel­eyew ñi piwkeyeafiel ta Jewba. Feymu rupalu llükafalchi dungu mew, David llükakelafuy. Kidu kimi Jewba ñi weniyeetew, ka feymu kelluafeyew. Kiñe rupa mu, ngüneytumekelu David tañi ufisa, ¡kiñe trapial (pullem wentru) lefkontupueyew ka yeñma­eyew kiñe ufisa! ¿Chumi David? Inantukufi feychi trapial, ka langümürkefi kidu ñi kuwü mu chi. Ka femngechi lefkontupufilu kiñe oso tañi ufisa, David ka langümfi. ¿Iney am kellueyew ta llükanchengenoal (llükanten-ngenoal)?... Feley tati, Jewba kellueyew.

Ka kiñe rupa mu, David llükakelafuy. Pu israelche petu kewamekelu (weychamekelu) pu filisteoche engün. Mülefuy kiñe filisteo weychafe (awkafe) Goliat pingelu, fütra wentrungefuy, kiñe alüpürachi wentru llemay (pütra wentru yem). Goliat ayentuniekefuy Jewba ka Israel ñi pu wey­chafe. Ka kintukakewafi (kayñeltubi) tati pu weychafe, fey feypimekefi: ‘¿Iney am küpa kewaenew (nalpeenu)?’. Welu kom pu wey­chafe llükaniefingün ta Goliat, feymu iney no rume pilay ñi kewayafiel (nalalu). Allkülu David Goliat ñi feypin, feypifi: ‘¡Iñche kewayaeyu (nalaeyu)! ¡Jewba kelluaenew, ka wewaeyu tati!’. ¿Llükanchengefuy (llükanten-ngebuy) David?... Femlay, llükanchengekelafuy. Fey wüla ¿chumi am David?

David ñimituy kechu luyüf kura ka yeniey tañi witruwe (witrukurawe), fey kewafi tati alüpürachi wentru (nalbi tati pütra wentru). Pefilu ñi weche wentrungen müten ta David, Goliat ayentunieeyew. Feymu David feypifi: ‘Eymi kewapaen (nalpan) kiñe wayki mu, ¡welu iñche chaftuaeyu Jewba ñi üy mew!’. Fey wüla David lef amuy ti alüpürachi wentru mu (pütra wentru mu). Tukuy kiñe kura tañi witruwe mew, ka ütrüftufi; tañi tol mu küllüfi. ¡Feyka müten Goliat tralalnagi mapu mu, lay tati fütra wentru! Pelu chem dungu rupalu, tati pu filisteoche rume (mütre) llükayngün, fey lefmawingün. ¡David chi weche wentru wewfi ti alüpürachi wentru (pütra wentru)! ¿Chumngechifel chi tüfa (chumngechi tañi femngechin)? ¿Chem piafuymi eymi?... Jewba ta kellueyew, ¡chem fütra wentru no rume trürümfal-lay ñi newen mu!

¿Chem kimeltueiñmew David ñi rupan?... Chem che mu rume Jewba doy newen-ngey. Feymu llemay llükalmi, longkontukuaymi tüfa: Jewba weniyeeymu tati, ka kelluafeymu tami llükanchengenoal (llükanten-ngenoal).