David ca Goliat

Chau Jehová feipifi Samuel: “Pemeafimi ta Jesé. Quiñe tañi pu fotüm lonco ülmencünuafiñ Israel mu”. Puulu Samuel pefi Jesé tañi hunen fotüm, fei raquiduami: “¿Tüfa llemai dullipelafi Jehová?”. Huelu Chau Jehová feipi: “Tüfa dullilafiñ. Iñche ngüneduamquelan tañi ad müten tati pu che, doi mai tañi piuque engün”.

Jesé pengelelfi ta Samuel caquelu 6 tañi pu fotüm. Huelu Samuel feipieyu: “Chau Jehová dullilafi inei no rume tüfa engün. ¿Doi nieimi fotüm?”. Jesé feipi: “Mülei tati doi inalelu, David, cuidamequei pu ufisha”. Aculu David, Chau Jehová feipifi Samuel: “¡Tüfa tati!”. Feimu Samuel tuculelfi aceite tañi lonco mu. Femngechi dullifi ñi lonco ülmen-ngeal Israel mu.

Rupai tiempo, fei caiñetuucülequefui pu Israel che ca pu Filistea che. Filistea mu mülefui quiñe fütra alüpürachi hueichafe, Goliat pingefui. Fei fill antü ayentuquefi pu Israel che, ca nehuentu feipiquefui: “Huercümün quiñe huentru tayu quehuayal. Hueungeli, iñchiñ serfihuaiñ. Huelu iñche hueuli, eimün serfiniemuaiñ”.

David yelelfi iyael tañi pu peñi hueichafengelu. Fei allcüi ñi feipimequen Goliat, feimu David feipi: “¡Iñche quehuameafiñ!”. Huelu ti lonco ülmen Saúl feipieyu: “Rume huechengeimi”. Fei David feipi: “Chau Jehová quelluaeneu”.

Saúl tuculelfi ta David tañi fanechi armadura, huelu David feipi: “Tüfachi tacun mu pepi quehualayan”. Feimu mai, David nüfi tañi huitruhue, quintumei 5 pañush cura huitrunco mu, fei tucufi tañi carpa mu. Lefcülen amui Goliat mu. Goliat feipi: “¡Eimi, pichi huentru, fülconpange, fei peaimi! Hulcünuafiñ tami cuerpo ñi iyal pu üñüm ca pu culliñ”. David llicalai, fei feipi: “Eimi cüpalimi quiñe fütra cuchillo ca quiñe huaiqui, huelu iñche cüpan Chau Jehová tañi üi mu. Iñchiñ quehuamulaiñ, Chau Jehová llemai quehuamequefimi. Com quimaingün, Chau Jehová doi nehuen-ngei ta quiñe fütra cuchillo ca quiñe huaiqui mu. Fei hultucuaimünmeu iñchiñ taiñ cuhu mu”.

David tucui quiñe cura tañi huitruhue mu, fei com tañi nehuen mu ütrütufi. Chau Jehová ñi quellun mu, ti cura puhui Goliat tañi tol mu. Fei ti fütra alüpürachi huentru lai. Feimu lefmahuingün pu Filistea huentru ñi langümngenoal. ¿Eimi cai? ¿Maneluuqueimi Chau Jehová mu David reque?