Timotew küpa kellufi tati pu che

Timotew pingekefuy ti weche wentru. Fey kellukefi ta che, feymu ayüwkülekefuy. Fill mapu püle rupakefuy ñi kelluafiel ta che. Feymu llemay kiñe ayüfalchi mongen niefuy. ¿Doy küpa kimfuymi tüfachi weche wentru mu?...

Timotew tremi Listra pingechi waria mew. Tañi ñuke Eunise pingefuy, ka tañi chuchu (kuye ñuke) Loyda pingefuy. Petu pichikalu Timotew, tañi ñuke ka tañi chuchu kimeleleyew engu Jewba ñi dungu. Feymu llemay, petu pichi wentrungelu (püchü kampungelu) Timotew ayüy ñi kelluafiel tati pu che ñi kimafiel engün ta Jewba.

Petu weche wentrungelu Timotew, Pablo feypieyew: ‘Amuldungumean ka mapu mew. ¿Ayüfuymi tayu amual?’. Timotew müna ayüwi, feymu feypi: ‘¡May, ayüfun amual!’. Kidu ayüy ñi kellumeafiel ta che.

Timotew Pablo engu amuy Tesalonika waria mew, mülelu Masedonia mapu mu. Ka tañi puwal engu üyew, mülefuy fentren namuntu amual, ka farku mu miawingu. Fey puwlu engu Tesalonika mew, fentren che kellufingu ñi kimafiel ta Jewba. Welu kiñeke che rume illkuyngün (mütre lladküyngün), feymu küpa üñfitufingün ta Pablo ka Timotew. Feymu kañpüle amuyngu ñi amuldungumeal.

Dewma rupalu kiñeke küyen, Pablo feypifi ta Timotew ñi wiño pemeafiel tati pu peñi ka lamngen Tesalonika waria mu mülelu, fey kimalu ñi chumlen engün. Kiñeke wedake che rume (mütre) üñfitukefilu am tüfachi pu inayerpukefilu Jesu, feymu Timotew müley ñi llükanchengenoal (llükanten-ngenoal) ñi amual feychi waria mu. Timotew kutrantupiwkelekey ñi kimal tüfachi pu peñi ka lamngen ñi chumlen, feymu amuy müten ñi pemeafiel. Ka wiñotulu chew ñi mülen Pablo kümeke dungu küpaleleyew: ¡pu peñi ka lamngen Tesalonika waria mu mülelu amuley ñi poyefiel Jewba!

Timotew Pablo engu küdawülfingu ta Jewba fentren tripantu. Feymu Pablo wirintukuy: ‘Werküafiñ ta Timotew ñi kelluafiel tati pu peñi ka lamngen. Iney no rume trürlaeyew. Kidu am piwkeyefilu ta Jewba ka tati pu che’.

Eymi kay ¿piwkeyechekeymi? ¿Kelluafuymi tañi kimafiel engün ta Jewba?... Femülmi, kiñe ayüfalchi mongen nieafuymi ayüwkülen mu, Timotew reke.