Adán engu Eva allcütulafi ta Chau Dios

Quiñe antü quisulelu Eva, dungueyu quiñe filu. Ramtui: “¿Feipipeimu mai Dios tamu inoal chem anümca ñi fün no rume?”. Eva feipi: “Chem fün rume iyafuyu, huelu quiñe anümca ñi fün müten ngelai tayu iyal. Ifiliyu, layayu”. Huelu ti filu feipi: “Lalayaimu. Ifilmu, Chau Dios reque feleaimu”. ¿Rüfngepei mai ñi feipin ti filu? Femlai. Coila dungu tati, huelu Eva ngünencangei. Doi adquintufiel mu ti fün, fei doi ayüfi ñi iyafiel. Feimu ifi ca elufi ta Adán. Adán quimniefui ñi layal allcütunofile ta Chau Dios, huelu quimlu rume, ifi müten.

Rupalu tüfa, Chau Jehová ramtufi Adán engu Eva: “¿Chumngelu allcütumulan?”. Adán culpatufi ta Eva, ca Eva culpatufi ti filu. Adán engu Eva inalaingu Chau Dios ñi feipin, feimu Chau Jehová entufi engu ñi mülehuenoal Edén mu. Cafei elfalcünufi cümeque püllü ñi cuñiutucuafiel Edén ñi conhue, ca eli quiñe üicülechi fütra cuchillo ñi huiño connoal engu.

Chau Jehová cafei feipi ñi castigayafiel feiti filu coilatulu. Huelu tüfa rüf filu no tati. Filu deumangelai ñi dungual. Huelu mai quiñe huesa püllü adniefi ti filu ñi dunguafiel ta Eva, ayüfui ñi ngünencayafiel. Feiti huesa püllü Satanás pingequei ca Huecüfü. Cüpalechi antü mu Chau Jehová apümafi tati Huecüfü. Femngechi ngünencahuelayafi ta che ñi femal huesaque dungu.