¡Nierpuingu quiñe fotüm!

Abrahán engu Sara fentren tripantu yenieingu ñi nieucülen. Elcünuingu tañi cüme ruca ñi müleal quiñe tolto ruca mu. Huelu Sara maneluucülefui Chau Jehová mu, feimu tüngcülefui.

Sara rume ayüniefui ñi nieal quiñe püñeñ, feimu feipifi ta Abrahán: “Niepüñeñcünuafimi tañi cüdaufe Agar. Femülmi, iñche tañi püñeñ troquiafiñ”. Rupalu ta tripantu Agar niepüñeñi, Ismael üituculelngei.

Nierpulu Abrahán 99 tripantu ca Sara 89 tripantu, acurumei 3 huitran. Abrahán mangelfi ñi anücünuhual miñche anümca mu ca quiñentrür iyal. ¿Quimimi ineingen pu huitran? Cümeque püllü tati. Nütramcafingün ta Abrahán: “Cüpalechi tripantu mu, eimi ca tami domo nieaimu quiñe fotüm”. Sara allcütulerquei ponhuitu tolto ruca mu, fei ayecahui ca raquiduami: “Deu cushen, ¿niepeafun quiñe püñeñ?”.

Aculu ti tripantu, Sara niepüñeñi, femngechi ñi feipicünueteu Chau Jehová ñi püllü. Abrahán üituculelfi Isaac, feipilelu “ayecan”.

Isaac nielu 5 tripantu, Sara pefi Ismael ñi ayentumequefiel. Sara cuñiutucuniefi tañi püñeñ, feimu feipifi ta Abrahán: “Quechanentuafimi Agar ca tañi püñeñ”. Ellaca mu, Abrahán pilafui ñi femal. Huelu Chau Jehová ca cuñiutucuniefi ta Isaac, feimu feipifi ta Abrahán: “Femaimi chem tami feipieteu Sara. Iñche cuñiutucuafiñ ta Ismael. Huelu Isaac mu huechutripayai tañi eldungucünuel”.