QUIMELTUN 8
Abrahán ca Sara femingu ñi feipin Dios
Quiñe huaria fülcülefui Babel mu, Ur pingefui. Tiye mu ti pu che püramyequelafingün ta Chau Jehová, niefuingün fentrenque dios. Huelu mülefui quiñe huentru püramyequefilu ta Chau Jehová, Abrahán pingefui.
Chau Jehová feipifi ta Abrahán: “Elcünunge tami ruca ca tami pu che, pengelelayu cheu tami amual”. Ca eldungucünufi: “Quiñe fütra troquiñchengerpuaimi. Tami feyentun mu, cümelcayafiñ com pu che mülelu mapu mu”.
Abrahán quimlafui cheu tañi yeaeteu Chau Jehová, huelu maneluhui. Feimu Abrahán ca tañi domo Sara, tañi chau Taré ca tañi sobrino Lot inafingün Chau Dios ñi feipin. Pepicafingün tañi fillem, trecacünuhuingün.
Puulu engün ti mapu ñi feipieteu Chau Jehová, Abrahán nierquei 75 tripantu. Canaán pingefui ti mapu. Tiye mu, Chau Jehová eldungucünufi: “Com tüfachi mapu tami pefiel, eluafiñ tami pu fotüm”. Huelu, Abrahán ca Sara deu füchaingu, ca nielaingu yall. Fei Chau Jehová, ¿chumngechi huechunenturpuafui tañi eldungucünuel?
“Abrahán tañi feyentulen mu allcütufi ta Chau Ngünechen [...]. Amui feichi mapu feipicünungelu ñi ngen-ngeal. Quimnolu rume cheu ñi amual, amui müten” (Hebreos 11:8).