¿Nehuen-ngepefui mai ñi feyentun?

Abrahán quimeltufi ta Isaac ñi piuqueyeafiel ta Chau Jehová ca ñi maneluucüleal tañi feipicünuel mu. Nierpulu Isaac 25 tripantu, Chau Jehová feipifi ta Abrahán ñi femal quiñe fütra dungu. ¿Chem feipifi ñi femal?

Chau Dios feipifi Abrahán: “Füreneen, amuaimi tami quiñen fotüm eimu Moria huincul mu, fei chalintuculelaen”. Abrahán quimlafui chumngelu femngechi feipieyu Chau Jehová, huelu femi ñi feipieteu.

Ca antü pulihuen mu, Abrahán, Isaac ca 2 cüdaufe amuingün Moria huincul mu. Rupalu 3 antü hula, petu camapulefuingün, huelu pefingün fillque huincul. Abrahán feipifi tañi pu cüdaufe: “Esperamuiñ, Isaac iñchiu amuayu püramyeafiel ta Chau Dios, fei huiñotuayu”. Abrahán yeniei ti cuchillo, ca Isaac ti mamüll. Feimu Isaac ramtufi tañi chau: “¿Cheu mülei ti culliñ taiñ chalintuculelafiel ta Chau Jehová?”. Abrahán feipi: “Saquin fotüm, Chau Jehová eluaiñmu”.

Puulu engu huincul mu, deumaingu quiñe altar. Dehuelcalu engu, Abrahán trariñmafi Isaac tañi namun ca cuhu, fei altar mu elcünufi.

Abrahán nüfi ti cuchillo, huelu feimeu müten quiñe cüme püllü feipi: “¡Abrahán! ¡Elcünufinge ti hueche huentru! Eluucüleimi chalintucual tami quiñen fotüm, feimu feula quimün tami rume yamniefiel ta Chau Dios”. Fei Abrahán pei quiñe caniru nülcülelu tañi müta quiñe anümca mu. Pürüm neicümfi Isaac, fei chalintucufi ti caniru.

Feichi antü, Chau Jehová tañi hueni troquifi ta Abrahán. ¿Chumngelu feipi? Abrahán femi com ñi feipieteu Chau Jehová, quimnolu rume chumngelu ñi feipieteu.

Chau Jehová huiño feipifi ta Abrahán: “Cümelcayayu, alün-ngeai tami pu che”. ¿Chem pin tüfa? Abrahán tañi familia mu, Chau Jehová eluafui fentren cümeque dungu com tati pu che cüme femquelu.