Quiñe esclavo inaquefilu Chau Dios ñi feipin

Jacob tañi fotüm José pingelu doi huechengefui epe com tañi pu peñi mu, ca Jacob doi piuqueyenieyu. Quimtuculu tüfa tañi pu peñi, ¿chum duamingün? ¿Chem pimi? Rume ütrirfingün ca üdefingün ta José. Quiñe pun, José peumai ca quimelelfi tañi pu peñi. ¿Chem pilefui ñi peuma? Quiñe antü müleafui ñi pochongnagal engün José tañi adquiñ mu. Feimu, doi üdefingün ta José.

Quiñe rupa, José ñi pu peñi cuidamefingün pu ufisa inafül Siquem huaria mu. Fei Jacob huercüfi ta José ñi pemeafiel ñi chumlen tañi pu peñi. Epe puulu José, tañi pu peñi adquintueyu, fei nütramcahuingün: “Cüpalei ti peumafe. ¡Langümafiyiñ!”. Fei nüfingün ca ütrüftucufingün quiñe fütra lolo meu. Huelu, tañi peñi Judá feipi: “Langümlayafimün. Doi mai, fendeafiyiñ ñi esclavongeal”. Fei rupalu quiñeque Madián che negociaquelu amulelu Egipto mu, fendefingün 20 troquiñ plata mu.

Fei hula, tañi pu peñi tuculelfingün capüra mollfüñ José ñi tacun mu, yelelfingün tañi chau ca ramtufingün: “¿Tami fotüm ñi tacun no am chi?”. Jacob feipi: “Tañi fotüm ñi tacun tati. ¡Ahuem! Huapo culliñ peno langümüñmaeneu ñi fotüm”. Feimu rume hueñancüi. Chem no rume entuñmalaeyu ñi hueñancün.

José puhui Egipto mapu mu, fei quiñe ülmen huentru Potifar pingelu ngillaeyu ñi cüdahuelaeteu. Huelu Chau Jehová quisucünulafi ta José. José cüme cüdauquefui ca manelfalchengefui. Fei pichiñma mu, Potifar loncocünufi ta José ñi adcünual com ñi nieel.

Potifar tañi domo ayüfi José ñi cüme adngen ca ñi nehuen huentrungen. Feipifeipiyefi ta José: “Cudumuhuayu”. ¿Chumquefui José? Famentuquefi feiti domo ca feipifi: “Femlayan, huesa dungu tati. Tami huentru iñche tañi ñidol tati, maneluhui iñche mu. Cudumuuliyu, culpayan Chau Dios ñi adquiñ mu”.

Quiñe antü, Potifar ñi domo cüpa obligafi José ñi cudumuhual. Feimu nüñmafi José tañi tacun, huelu leftripai José. Potifar acui tañi ruca mu, tañi domo coilatuleyu, “José ayüfui ñi nüntucayaeteu” pi. Potifar carceltucufi ta José fente ñi huesa duamcülen. Huelu Chau Jehová piuquentucuniefi ta José.