Chau Jehová piuquentucuniefi ta José

Faraon, tüfa tati lonco ülmen Egipto mapu mu, peumai. Huelu inei no rume pepi adümlafui tañi peuma. José petu carcelconcülefui. Feimu quiñe cüdaufe feipifi ta faraon: “José quimeltuafeimu ñi chem pifel tami peuma”. Fei, ti faraon müchai müten huercüfi ñi yemengeal ta José.

Aculu José, faraon ramtueyu: “Eimi, ¿feipipeafen mai chem pifel tañi peuma?”. José quimniefui ñi chem pifel, ¿inei anta quellueyu ñi quimal? Chau Jehová llemai. Feimu José feipifi ta faraon: “Egipto mapu mu müleai fentren iyael 7 tripantu mu, fei hula ca 7 tripantu mu müleai fütra filla. Feimu, ñi lanoal pu che, quintuaimi quiñe quim huentru ñi ngülümal iyael”. Ti faraon feipi: “¡Eimi elfalcünuayu! Elungeaimi fentren autoridad Egipto mapu mu, iñche müten doicülean eimi mu”.

José ngülümi iyael 7 tripantu mu. Fei hula femtripai ñi feipicünuel, mülerquei fütra filla fill püle. Feimu fentren che amuquefui Egipto ñi ngillacayal iyael. José tañi chau, Jacob, feipingei ñi mülen iyael Egipto mu, feimu huercüfi 10 tañi fotüm ñi ngillacameal.

Aculu Jacob ñi pu fotüm, José quimfemi ñi ineingen engün. Huelu fei engün quimlaeyu, fei pochongnagingün José tañi adquiñ mu. Femngechi femtripai José tañi cuifi peumael. José ramtuuquefui: “¿Petu üdeniepeneu mai tañi pu peñi?”. Feimu feipifi engün: “Eimün lloftupapeimün müten taiñ mapu. Re cüpa quimpaimün chem dungu mu taiñ nehuencülenon”. Huelu huiñoldunguingün: “¡Femlaiñ, Ñidol! Canaán mu müleiñ. Iñchiñ 12 peñihuen-ngefuiñ, huelu 1 taiñ peñi lai, cangelu mülecai taiñ chau engu”. José feipi: “Cüpalelmuan tamün peñi, femngechi quimürpuan ñi rüfngen tamün feipin”. Fei, amutuingün tañi ruca mu.

Huiño fillalerpulu Jacob tañi pu che, Jacob ca huiño huercüfi tañi pu fotüm ta Egipto. Feula yefingün tañi inan peñi Benjamín. José ayüniefui quimal chem mülefui tañi pu peñi ñi piuque mu. Feimu ellcafi tañi copa plata Benjamín tañi sacu mu, fei dalluntucufi engün ñi hueñeñmangen. Pengelu ti copa Benjamín tañi sacu mu, tañi pu peñi afmatulehueingün. Fei, feipifingün ta José: “Fürenemuiñ, castigalayafimi taiñ peñi Benjamín. Iñchiñ mai castigamuiñ”.

Femngechi José quimürpui ñi cüme piuquengen tañi pu peñi feula. Fente ñi ayühun, ngümangümatripai, fei feipi: “Iñche ta José, eimün tamün peñi. ¿Petu mongelecai tañi chau?”. Doi afmatulehueingün tañi pu peñi. Feimu, José ca feipifi: “Huesa duamquilmün tamün huesa femün mu. Chau Dios cüpaleneu ñi montulcheal. Huelu ¡matu amumün!, yemeafimün tañi chau”.

José tañi pu peñi amutuingün tañi ruca mu, feipifingün tañi chau tüfachi cüme dungu, fei yefingün ta Egipto. Fentren tripantu rupauyefui, fei José huiño trahutui tañi chau engu.