Afmatun dungu rupai Quelü lafquen mu

Ti faraon feipingei: “Pu Israel che tripaingün Egipto mu”. Faraon cacünutui ñi raquiduam, “¿chumngelu lifrecünufiñ?” pi. Feimu, feipifi tañi pu soltau: “¡Pepicamün tamün carretela! ¡Inantucuafiyiñ!”. Fei ti faraon ca tañi pu soltau eluhuingün ñi inantucuafiel pu Israel che.

Fill antü, Chau Jehová adniequefui pu Israel che quiñe tromü meu, ca pun meu adniequefui cütral mu. Femngechi puhuingün inaltu Quelü lafquen meu ñi umañpual.

Pu Israel che pefingün ñi inantucunieteu faraon ca tañi pu hueichafe. Ngelafui cheu tañi lefmahual, quiñe püle mülefui ti lafquen, cañpüle mülefui faraon ca tañi pu hueichafe. Feimu pu Israel che huiraringün ñi feipiafiel ta Moisés: “¡Feula layaiñ! ¡Müna huesa! ¿Chumngelu entumuiñ Egipto mu?”. Huelu Moisés feipifi engün: “¡Llicaquilmün! Maneluucülemün, fei peaimün chumngechi tamün montulaeteu Chau Jehová”. Moisés rume maneluuquefui Chau Jehová mu, ¿felei? ¿Chem pimi?

Chau Jehová feipifi pu Israel che ñi pepicahual, fei ñi tripayal engün. Punlu, elcünufi ti tromü ñi rumenoal pu Egipto che. Fei, cheu ñi mülen pu Egipto che dumiñcülefui, huelu pu Israel che niefui ta pelon.

Chau Jehová feipifi ta Moisés: “Fampuhulafimi tami cuhu lafquen meu”. Fei, eli quiñe fütra cürüf com ti pun meu. Hudatripai ti lafquen, fei mülerpui quiñe rüpü. Femngechi com pu Israel che rumeingün ti lafquen ancülechi rüpü mu.

Faraon tañi pu hueichafe engün inantucufingün pu Israel che feiti rüpü mu. Huelu Chau Jehová llicalcafi engün. Huesalcafi pu Egipto che tañi carretela, llancünagi tañi rueda. Pu hueichafe huiraringün: “¡Lefmahuaiñ, anai! ¡Jehová quehuamequei pu Israel che ñi duam mu!”.

Chau Jehová huiño feipifi ta Moisés: “Ca huiño fampuhulafimi tami cuhu lafquen meu”. Fei, ti lafquen tacurumefi com pu Egipto che. Lai faraon ca com tañi pu hueichafe, quiñe no rume mongetripalai.

Nometu ti lafquen mu, com che ülcantulelfingün ta Chau Jehová ñi püramyeafiel. Tüfa tati ülcantun: “Chau Jehová fütra hueutripai, feimu ülcantulelafiñ. Ti cahuellu ca ti püracahuellulelu ütrüftucufi lafquen mu”. Petu ülcantumequelu engün, pu domo failamequefuingün ca dungulmequefuingün ti pandero. Rume ayüucületuingün tañi lifrelen mu feula.