Moisés eluhui ñi poyeafiel ta Chau Jehová

Jacob tañi pu che Israel che pingequefui Egipto mu. Lalu Jacob ca José, cangelu faraon ngünenierpui Egipto mu. Feichi faraon llicai ñi doi alün-ngerpun pu Israel che tati pu Egipto che mu. Feimu obligafi ñi rume cüdahuelaeteu, mülefui ñi deumayal ladrillo ca fillque cüdau lelfün mu. Pu Egipto che doi huesalcafingün, huelu doi fentren-ngetuingün pu Israel che. Ti faraon ayülafui ñi doi fentren-ngeal, feimu feipi ñi langümngeal com pu huentru pichiche, huelu pu domo pichiche langümngelai. ¿Rume llicalepelai pu Israel che?

Quiñe Israel domo niefui quiñe adngechi pichiche. Fei ñi langümngenoal tucufi quiñe cülco mu ca ellcacünufi rangiñ alüpürachi cachu mu inaltu leufü. Ti pichiche ñi lamngen, Míriam pingelu, püllelefui ñi adquintunieal chem ñi rupamequen.

Faraon tañi ñahue müñetumei leufü mu, pefi ti cülco, nülafi, fei ponhuitu mülefui ti pichiche, petu ngümamequefui. Feimu cutranpiuqueyefi. Míriam feipieyu: “Yemeafun quiñe domo ñi moyolaeteu ti pichiche, ¿felei?”. “Felei, amunge” pifi. Míriam yemefi tañi ñuque, Jokébed pingelu. Fei, faraon tañi ñahue feipifi ta Jokébed: “Yetufinge tüfachi pichiche, cuidayafimi, iñche culliayu”.

Faraon ñi ñahue yelelngetui ti pichiche doi pichi alühuelu. Fei, Moisés üitucufi ca quisu tañi huentru püñeñ reque tremümfi. Ülmen huentrungefui ca elungeafui com tañi ayünieel. Huelu rumel loncontucuniefi ta Chau Jehová. Moisés quimniefui tañi Egipto chengenon, doi mai tañi Israel chengen, fei eluhui ñi poyeafiel ta Chau Jehová.

Nielu 40 tripantu, Moisés eluhui ñi quelluafiel tañi pu che. Quiñe rupa, pefi quiñe Egipto che ñi hulelcamequefiel quiñe Israel che. Feimu, Moisés hulelfi ti Egipto che. Fente ñi nehuentu hulelfiel, langümfi, fei ellcacünufi miñche cuyüm mu. Ti faraon quimürpui ñi femün Moisés, fei cüpa langümeyu, huelu Moisés lefmahui, amui Madián mapu mu. Üye mu Chau Jehová cuidanieyu.