Kiñe weda wentru ngünenielu Egipto mu

TÜFACHI pu wentru pefimi tüfa, dikuntükuniefi che ñi küdawal. ¡Adkintufinge feychi wentru wülelniefi ti küdawfe, kiñe koron mew! Pu küdawfe Jakob ñi reñma, ka Israel che pingerkey. Ka tüfachi dikuntükuchelelu feyta Egipto che. Pu Israel che küdawelchi kona ngerpuyngün. ¿Chumngechi rupay tüfa?

Fentren tripantu mu Jakob ñi fütra reñma mülekefuy engün tüngkülen Egipto mu. Jose, doy falin-ngechi wentru ngelu Egipto mew inan Faraon mew, ngüneytuniekefuy engün. Welu Jose lay. Ka kiñe we Faraon ngünenierpuy Egipto mu, welu ayükelafi tati pu Israel che.

Fey mew tüfachi weda Faraon, elkünufi ñi konayeafiel tati pu Israel che. Ka elfalkünufi feyti pu wentru illamfal ka weda piwkengelu, ñi ngünieafiel fey engün mew. Tüfachi wedake wentru dikuntükuniefi pu Israel che ñi rume küdawal, dewmalelkefuyngün fentreken waria Faraon. Welu pu Israel che amuley ñi fentren ngeyngün. Rupachi antü mew, pu Egipto che llükarpufingün pu Israel che ñi pütrün che ngerpual, ka ñi rume newen-ngeal.

¿Kimimi chumi am Faraon? Dungufi pu domo kellupüñeñelchekelu pu israel domo engün, ka feypifi: ‘Müley tamün langümafiel kom pichike wentru püñeñel.’ Welu kümeke domo ngeyngün, ka langümkelafingün pu we püñeñ.

Feymu lle Faraon feypifi tüfachi werkün dungu kom ñi pu che: ‘Nümeafimün kom pu we wentru püñeñ Israel che, ka langümafimün. Mongelafimün pu pichike domo müten.’ ¿Weda dungu no amta ñi werküngen tüfa? Peafiyiñ chumngechi montuy kiñe pichi wentru.