Cayu inalechi huesa dungu

Moisés ca Aarón pemefingu ta faraon ñi quimelelafiel chem ñi feipin Chau Dios: “Elunofilmi ñi tripayal tañi pu che, fentren tabano müleai tami mapu mu”. Fentren tabano, pütroquiñ ca pingelu, coningün fill püle Egipto mu, pu ülmen che tañi ruca mu ca pu pofre tañi ruca mu. Com ti mapu apolefui fentren tabano mu. Huelu Gosén mapu mu, cheu ñi mülequefel pu Israel che, ngelafui quiñe tabano no rume. Tüfachi huesa dungu ca tati inalechi huesalcalafi pu Israel che, huelu mai pu Egipto che müten. Feimu ti faraon feipifi ta Moisés: “Füreneen, llellipufinge ta Jehová ñi mülehuenoal tüfaquechi tabano, fei hula tami pu che tripayafuingün”. Chau Jehová femi ñi llellipueteu, huelu ti faraon elulafi ñi tripayal pu Israel che. ¿Chem pimi? Ti faraon, ¿nor raquiduamtupeafui mai?

Chau Jehová ca feipi: “Ti faraon eluunole ñi tripayal tañi pu che, pu Egipto che ñi pu culliñ cutranaingün ca layaingün”. Ca antü, huechurpui ñi feipicünuel Chau Jehová, huelu pu Israel che ñi pu culliñ cüme feleingün. Femlu rume, ti faraon amulei tañi trencül piuquengen.

Feimu Chau Jehová feipifi ta Moisés ñi huiño pemeafiel ti faraon ca ütrüfpüramafiel mulpun ti cürüf mu. Feiti mulpun trufürngetui, ti cürüf yefi huall Egipto mu, fei tacufi pu Egipto che ca tañi pu culliñ, fei com apoingün fütraque pitru mu. Huelu ti faraon petu elulafi ñi tripayal pu Israel che.

Chau Jehová huiño huercüfi ta Moisés ñi dungumeafiel ta faraon: “¿Petu elulafimi ñi tripayal tañi pu che? Hule nacüman fentren pire”. Femngechi rupai, Chau Jehová eli fütraque pire, tralcan ca cütral. Turpu femngechi rupaquelafui Egipto mu. Apümcafi com pu anümca ca lelfün Egipto mapu mu, huelu Gosén mapu mu chem no rume rupalai. Feimu ti faraon feipi: “Llellipufinge ta Jehová ñi fentecünual tüfachi huesa dungu, fei hula tripayafuimün”. Huelu, rupalu ti pire ca mahun, ti faraon huiño trencül piuquecünuhui.

Feimu Moisés feipi: “Feula fentren langosta iyaingün com ñi apümcanoel ti pire ca mahun”. Rume fentren langosta ifingün com ti mülehuelu pu anümca ca lelfün mu. Feimu ti faraon ca feipifi ta Moisés: “Füreneen, llellipufinge ta Jehová ñi nentuafiel pu langosta”. Chau Jehová nentufilu hula pu langosta, ti faraon amulei ñi trencül piuquengen.

Chau Jehová feipifi ta Moisés: “Huitrañpüramnge tami cuhu huenu mu”. Fei pürüm fütra dumiñcünuhui. Dumiñcülefui 3 antü, feimu pengen-ngehuelafui chem no rume. Huelu cheu ñi mülen pu Israel che müten pelolefui.

Ti faraon feipifi ta Moisés: “Eimi ca tami pu che amumün, huelu elcünuafimün tamün pu culliñ”. Fei Moisés feipieyu: “Mülei taiñ yeal taiñ culliñ ñi chalintuculelafiel ta Chau Jehová”. Huelu ti faraon huirari: “¡Amutunge! Huiñotulmi tañi adquiñ mu, langümayu”.