Cüla huesa dungu

Pu Israel che esclavongefuingün Egipto mu, fei obligangequefuingün ñi rume cüdahual. Chau Jehová huercüfi Moisés ca Aarón ñi feipiafiel ta faraon: “Elufinge ñi tripayal tañi pu che tañi poyeaeteu huellin mapu mu”. Huelu ti faraon rume mallma huentrungefui, feimu feipi: “Duamlafiñ ñi feipiel Jehová. Elulayafiñ ñi tripayal pu Israel che”. Fei, ti faraon doi fentren cüdau elufi pu Israel che. Huelu, ¿chem chumi Chau Jehová? Elufi 10 huesa dungu ñi rupayal ta Egipto. Chau Jehová feipifi ta Moisés: “Ti faraon allcütulaeneu. Feimu, pulihuen mu, feipimeafimi inaltu Nilo leufü mu: ‘Elulafimi ñi tripayal Chau Dios tañi pu che, feimu com mollfüñcünuhuai tati co leufü’”. Moisés femi ñi feipieteu Chau Jehová, fei Aarón engu pemefingu ta faraon. Aarón cupafnacümfi ti leufü, fei mollfüñcünuhui ti co. Ti leufü rume huesa nümüi, pepi pütocongelai tañi co, ca com ti challhua laingün. Huelu ti faraon elulafi pu Israel che ñi tripayal engün.

Rupalu 7 antü, Chau Jehová huercüfi Moisés ñi feipiafiel ta faraon: “Elunofilmi ñi tripayal tañi pu che, Egipto mu apoleai pacarhua mu”. Ti faraon allcütulai, feimu Aarón huitrañpüramfi tañi retrü, fei com ti mapu apolerpui pacarhua mu. Mülerpui pacarhua com ruca mu, cahuitu mu, ca rali iyael mu, ¡fill püle mülefuingün! Ti faraon feipifi ta Moisés: “Feipifinge ta Jehová ñi fentecünual tüfachi huesa dungu. Fei eluafiñ ñi tripayal pu Israel che”. Chau Jehová fentecünufi ti huesa dungu, fei pu Egipto che trapümfingün fentren lalechi pacarhua, ti mapu rume huesa nümüi. Huelu ti faraon ca elulafi ñi tripayal pu Israel che.

Chau Jehová ca feipifi ta Moisés: “Feipifinge ta Aarón ñi cupafnacümafiel ti mapu tañi retrü mu. Fei, ti trufür pichique pülüngetuai”. Femngechi rupai, com Egipto mapu mu apolei pichique pülü mu üpirquefilu pu che. Quiñeque Egipto che feipifingün ta faraon: “¡Chau Dios mu cüpai tüfachi huesa dungu!”. Huelu ti faraon petu elulafi ñi tripayal pu Israel che.