QUIMELTUN 25

Quiñe ruca ñi poyengeam Chau Dios

Sinaí huincul mu, Chau Jehová feipifi ta Moisés ñi deumayal quiñe ngillatuhue tolto ruca. Tüfa teifücangequefui ñi yengeal cheu rume, fei pu Israel che poyeafui ta Chau Jehová feichi tolto ruca mu fill püle tañi miyahun engün.

Chau Jehová feipi: “Feipiafimi pu Israel che ñi trapümal itrofillem, fei ñi deumangeal ti tolto ruca”. Pu Israel che trapümfingün oro, plata, cobre, falinque cura ca llancatu. Cafei trapümingün cal, lino, trülque culliñ ca caquelu femngechi dungu. Ayühunquechi hulingün fentren dungu, feimu Moisés feipi: “Feicai, fentecünumün. Deu com trapümfiyiñ”.

Pu Israel che ayühunquechi hulqueingün chem ñi duamniengeel, fei ñi deumangeal ti ngillatuhue tolto ruca

Fentren adümuhun-ngechi domo ca huentru cüdahuingün ñi deumayal ti ngillatuhue tolto ruca. Chau Jehová elufi quimün ca adümuhun ñi cüme femal itrofill cüdau. Quiñeque füuquefui ca ngürequefuingün, caquelu cüdauquefui oro mu, catrüquefuingün ca adcünuquefuingün cura, cafei cüdauquefuingün mamüll mu.

Pu Israel che deumaingün ti ruca chumngechi ñi feipin Chau Jehová. Lepün mu mülefui 1 fütra cobre lafatorio ca 1 altar. Deumaingün quiñe adngechi cortina ñi hudamafiel ti tolto ruca 2 troquiñ mu: ti Yamfal Mülehue ca tati Doi Yamfal Mülehue. Ti Yamfal mülehue mu mülefui 1 oro candelabro, 1 mesa ca 1 altar ñi lüpümngeal incienso. Ca tati Doi Yamfal Mülehue mu mülefui quiñe falin caja, oro mu deumangelu ca acacia mamüll mu. Tüfachi caja pengelquefui Chau Dios ñi eldungu. ¿Quimimi chem pifel “eldungu”? Feita quiñe falin dungu ñi feipicünungeel. Feimu, tüfachi falin caja raquiduamelquefui pu Israel che chem tañi feipicünuel: “Femaiñ com ñi feipin Chau Dios”.

Chau Jehová sacerdotecünufi ta Aarón ca tañi pu fotüm, fei ñi cüdahual ngillatuhue tolto ruca mu. Mülefui ñi cüme cuidayafiel ca chalintuculelafiel culliñ ta Chau Jehová. Fill tripantu, ti hunen lonco sacerdote müten elungequefui ñi conpual tati Doi Yamfal Mülehue mu 1 rupa. Fei Aarón conquefui ñi llellipuafiel ta Chau Jehová, fei ñi perdonangeal com tañi culpan engün.

Tripalu Egipto mu, pu Israel che cüdahuingün 1 tripantu ñi deumayal ti tolto ruca. Fei nierpuingün cheu ñi poyeafiel ta Chau Jehová.

Chau Jehová pengelcünui ñi ayüfiel ti ngillatuhue tolto ruca ca huente mu elcünui quiñe tromü. Feiti tromü anünagquefui ñi pengelafiel pu Israel che tañi mülenagal fei mu. Huelu püraquefui, fei ñi huiñamtuhual engün. Fei, teifücaquefuingün ti tolto ruca ca inaquefuingün ti tromü.

“Chau Ngünechen ñi tolto ruca mülei tati pu che meu, quisu mülenagcüleai fei engün meu, fei tañi troquiñchengeai engün. Chau Ngünechen llemai müleai tati pu che meu” (Apocalipsis 21:3).