Kiñe tolto ruka ñi poyeam

¿KIMIMI eymi chem am tüfachi fütra ruka? Feyta kiñe doy sakin-ngechi tolto ruka ñi poyengeam Jewba. Tachi pu che dewmafingün kiñe tripantu müten dew tripamum Egipto mew. ¿Kimimi iney (iñi) ñi rakiduam ñi dewmangeal tüfa?

Jewba ñi rakiduam llemay. Petu mülepulu Moyse wechun fütra wingkul mew Sinay pingelu, Jewba feypieyew chumngechi ñi dewmayafiel. Feypifi ñi dewmayal ñi müchay tewfungetual (wichan-ngetoal). Feymu kom ñi trokiñ kañpüle ñi pepi yengeal, ka üye mew yengele ka ñi dewman-ngetual. Feymu lle, wiñamtulu pu Israel che wiño kañpüle amulu wellin mapu mew, yenieyngün tüfachi tolto ruka.

Küme lelifilmi (kintulfilmi) feychi pichi (püchü) katrüntüku afpun ti tolto ruka mew, peafuymi kiñe kakon. Tüfachi kakon fey ñi elngeam pu tukulpapeyüm Chaw Ngünechen elkünuy pu Israel che, ka epu wechun mew niey epu werken püllü, kerubin ka pingelu, milla dewmangey. Chaw Ngünechen wiño wirintükuy ti Mari Werkün Dungu, epu llingüd kura mew, Moyse trafolfilu am ti wünen-ngelu. Ka tüfachi kura elkünulelngey ponwi kakon mew. Ka elkakünungey kiñe metawe nielu mana. ¿Tukulpaymi chem am ti mana?

Jewba dullifi (ngümintufi) Aaron, Moyse ñi peñi, ñi longko saserdote ngeal. Fey ngüyülkefi chi pu che ñi poyeafiel Jewba. Tañi pu fotüm ka saserdote ngeyngün.

Fewla adkintufinge ti doy fütra katrüntüku (kuarto) mülelu ti tolto ruka mu. Epu rume doy fütra tati pichi katrüntüku. ¿Pefimi ti pichi kakon fitrülelu? Tüfa fey ta llangüll (altar) chew pu sacerdote lüpümngepeyüm insienso, kiñe dungu küme nümün-ngelu tüfa. Ka pefinge feytichi kandelabro nielu regle pelontuwe. Ka müley ti katrüntüku mew kiñe mesa, wente mu mülekey mari epu kofke.

Ti tolto ruka ñi lepün mew müley kiñe fütra rali, lafatorio ka pingey, apoley ko mew. Tüfa mew pu saserdote küchakey engün ñi kuwü ka ñi namun. Ka müley tüfa kiñe fütra llangüll (altar). Tüfa mew lüpümngekey pu la kulliñ kiñe mañumtun Jewba mew. Tüfachi tolto ruka müley rangiñ mu mülelu pu Israel che, ka ti pu che inaltu tolto ruka müley engün kiduke ñi ruka.