Pu 12 huentru ngüneduammefilu ti mapu

Pu Israel che tripaingün Sinaí huincul mu. Amuingün Parán mapu püle, fei puhuingün Cadés mapu mu. Üye mu, Chau Jehová feipifi ta Moisés: “Caque quiñeque troquiñche Israel mu dulliaimi quiñe huentru, fei huercüafimi 12 huentru ñi ngüneduamafiel ti mapu ñi elungeal pu Israel che, Canaán pingelu”. Feimu Moisés dulli 12 huentru ca feipifi engün: “Amuaimün ta Canaán, fei ngüneduamafimün ñi cümepen mai ti mapu ñi ngan-ngeal. Ca ngüneduamaimün ñi nehuen-ngepen mai ti pu che, ca chem ruca ñi nieel engün”. Fei, pu 12 huentru amuingün ta Canaán, 2 tüfa engu feita Josué ca Caleb.

Rupalu 40 antü huiñotuingün pu huentru. Cüpalingün higo, granada ca ofad. Fei feipingün: “Rume cümei Canaán mapu, huelu hualloñmaeyu fütra cura malal ca tañi pu che rume nehuen-ngei”. Huelu Caleb feipi: “Amuaiñ müten, pepi huehuafiyiñ llemai”. ¿Chem pimi? ¿Chumngelu femngechi feipi Caleb? Caleb ca Josué maneluuquefuingu Chau Jehová mu. Huelu caquelu 10 huentru feipingün: “Amulayaiñ, fütraque che mülei üyeu. Iñchiñ ancapuulayafuiñ”.

Pu Israel che llicaingün, fei eluhuingün ñi huesa dungual, feipingün: “Dulliaiñ cangelu lonco, fei taiñ huiñotual ta Egipto. Langümngepelayaiñ Canaán mu, amulayaiñ”. Josué ca Caleb feipingu: “Femaiñ Chau Jehová tañi feipin, tüfa ta doi cümei, fei Chau Jehová cuñiutucuaiñmu. Ngelai tamün llicayal”. Huelu pu Israel che hacecasolaingün. Doyeli, ayüfuingün ñi langümafiel ta Josué ca Caleb.

¿Chumi cai Chau Jehová? Feipifi ta Moisés: “Rume cümelcafiñ pu Israel che..., huelu petu eluulaingün ñi femal iñche tañi feipin. Feimu müleai ñi miyahual 40 tripantu tüfachi huellin mapu mu, fei ñi layal engün. Tañi pu fotüm, pu ñahue ca Josué engu Caleb müten llohuaingün ti Feipicünuelchi Mapu”.