Ti hue lonco ca 2 domo llicaquenolu

Fentren tripantu Josué adniefi pu Israel che. Nierpulu 110 tripantu, lai. Fei pu Israel che poyerpufingün coilaque dios, pu Canaán che reque. Tañi huesa femün mu pu Israel che, Chau Jehová catrütulai ñi huesalcayaeteu ti lonco ülmen Jabín. Feimu pu Israel che llellipufingün ta Chau Jehová ñi quelluaeteu. Fei loncocünufi ta Barac ñi quelluaeteu engün cümelcautual Chau Jehová engün.

Chau Dios niefui quiñe huerquen domo Débora pingelu. Débora feipifi ta Barac: “Feipiayu ñi feipin Chau Jehová: ‘Amuaimi Cisón pingechi huitrunco mu. Yeafimi 10 mil hueichafe tami chaftuafiel ta Jabín. Üyeu huehuafimi tati lonco feichi troquiñ hueichafe mu, Sísara pingelu’”. Barac feipi: “Eimi amulmi, iñche ca amuan”. Débora feipi: “Compañayu, huelu eimi langümlayafimi ta Sísara. Chau Jehová feipi quiñe domo ñi langümaeteu”.

Débora, Barac ca tañi pu hueichafe engün püraingün Tabor huincul mu, fei pepicahuingün ñi quehuayal. Quimlu müten, Sísara amui tañi pu hueichafe engün inaltu ti huincul mu. Débora feipifi ta Barac: “Fachantü Chau Jehová quelluaimu, fei huehuaimi”. Barac amui tañi 10 mil huentru engün ñi chaftuafiel ta Sísara ca tañi pu hueichafe.

Cisón huitrunco mu, Chau Jehová mangiñmafi ti mapu. Feimu fotra mu pepi amulngelai pu carretela. Sísara elcünui ñi carretela, fei lefmahui, hueungei com tañi pu hueichafe. Huelu Sísara puhui cheu ñi mülefel quiñe domo, Jael pingelu. Jael elueyu cüme lichi ca tacueyu quiñe pontro mu. Sísara umaunagi fente ñi ürcülen. Jael ñücüfcülen mu fülmaeyu, fei clafantuculeleyu quiñe estaca tañi lonco mu, femngechi langümeyu.

Barac tripai ñi quintumeafiel ta Sísara. Jael trafyemeyu ca feipieyu: “Conpange, pengelelayu ti huentru tami quintuyahulfiel”. Conpulu Barac, pefi ñi deu lan ta Sísara. Fei Barac ca Débora entuingu quiñe ülcantun ñi mañumafiel ta Chau Jehová tañi quellueteu mu. Pu Israel che cüme feletuingün cüpalechi 40 tripantu mu.