Rut ca Noemí

Israel mapu mu acurumei fütra filla. Fei Noemí engu tañi füta ca tañi 2 familia huiñamtuhuingün Moab mapu mu. Quiñe antü, Noemí tañi huentru lai, tañi 2 huentru püñeñ nierpuingu Moab domo: Rut ca Orpá. Huelu ca quiñe antü, ca lai Noemí tañi 2 püñeñ.

Noemí allcülu ñi cümelcaletun Israel, eluhui ñi huiñotual. Rut ca Orpá compañeyu. Huelu petu rüpütulelu engu, Noemí feipi: “Eimu ta cümeque domo, cümeque nanüng. Cümeafui tamu huiño fütangetual. Huiñotumu ta Moab”. Rut ca Orpá feipieyu engu: “Quisucünuulayaiñ, rume piuqueyehuiyiñ”. Noemí fentren rupa feipifi ñi huiñotual engu. Fei Orpá amutui, huelu Rut femlai. Feimu Noemí feipifi: “Orpá huiñotui tañi mapu mu ca tañi pu dios mu. Eimi ca cümeafui tami huiñotual tami ñuque ñi ruca mu”. Huelu Rut feipieyu: “Quisucünulayaeyu. Eimi tami pu che iñche tañi pu chengeai, ca tami Dios iñche tañi Dios ngeai”. ¿Chem raquiduami Noemí feipingelu tüfa? ¿Chem pimi?

Rut ca Noemí puhuingu ta Israel hue cosechamequengelu cahuella. Üyeu mülerquefui Boaz, tüfa ta Rahab ñi püñeñ. Fei ñi mapu mu, Rut üñiftumei cahuella. Boaz quimniefui Rut ñi Moab chengen ca ñi quisucünunofiel ta Noemí. Feimu feipifi tañi pu cüdaufe ñi doi elcünual fün cahuella tañi mapu mu, fei Rut ñi üñiftual.

Feichi pun, Noemí ramtufi ta Rut: “¿Cheu am cüdahuimi fachantü?”. Rut feipi: “Boaz ñi mapu mu”. Noemí ca feipi: “Boaz parienteyefi tañi füta yem. Amulepe tami cosechamequen üye mu caquelu pu üllchaque domo engün, fei cüme feleaimi”.

Rut cüdahui üye mu aflu hula ti cosecha. Boaz ngüneduami ñi cüme domongen ca cüme cüdaufengen ta Rut. Feichi mu, pu lantu domo nienolu püñeñ ca huiño fütangeafui quiñe huentru parienteyefilu tañi füta yem. Fei Boaz niefi ta Rut. Nierpuingu quiñe pichi huentru Obed pingelu. Tüfa abuelongerpui tati lonco ülmen David mu. Noemí tañi pu hueni rume ayühuingün, fei feipieyu engün: “Chau Jehová hune elueimu ta Rut, tami cüme nanüng. Ca feula elueimu tami nieto. Feimu püramyeafiyiñ ta Chau Jehová”.