Chau Jehová deumalelngei quiñe ruca

Salomón eluulu ñi ngünenieafiel Israel, Chau Jehová ramtueyu: “¿Chem ayünieimi tami elungeal?”. Salomón feipi: “Huechengen iñche, nielan adümuhun. Feimu, füreneen, eluen quimün ñi cüme adnieafiel tami pu che”. Chau Jehová feipieyu: “Ayünieimi tami elungeal quimün, fei doi quimchengeaimi huall mapu meu. Cafei eluayu fentren falinque fillem ca alün mongen nieaimi inaniefilmi iñche tañi feipin”.

Salomón eluhui ñi deumayal Chau Dios ñi ruca. Cüme dullifi itrofillem tañi deumayafiel: doi cümechi cura, mamüll, oro ca plata. Fentren adümuhun huentru ca domo cüdahuingün. Rupalu 7 tripantu fentepui ti cüdau. Ñi hultuculelngeal ti ruca ta Chau Jehová, altar mu tucufingün ti chalintucun. Fei Salomón lucutunagi ca llellipufi ta Chau Jehová: “Ahuem, Chau Jehová, eimi mülefui tami elungeafel quiñe doi fütra ruca, doi afmatufalngelu. Huelu, fürenemuiñ, cüme llohuaimi taiñ femmequen tami püramyengeal, ca taiñ llellipun”. ¿Chem pimi? Chau Jehová, ¿ayüpefi mai tañi ruca? ¿Allcütupei mai Salomón ñi llellipun? Deu llellipucünulu Salomón, huenu mu nagpai cütral, fei lüpümfi ti chalintucun. Femngechi Chau Jehová pengeli ñi ayüfiel ti ruca. Pefilu tüfa pu Israel che, rume ayühuingün.

Ti lonco ülmen Salomón rume quimniengequefui huall püle Israel mu ca alü camapu cafei, fente ñi quimün-ngen. Pu che pemequefeyu ñi quellungeal norümtual fill dungu. Cafei, ti lonco ülmen domo Saba mapu mu pemeyu ñi ramtucadunguafiel cüdaungechi dungu. Allcütulu ñi feipieteu Salomón, feipi: “Feingenolu troquifiñ tañi feipingeel eimi mu, huelu ngüneduamün tami doi quimchengen tañi feipingeel mu. Tami Dios, Jehová, cümelcaeimu”. Cüme felefuingün pu Israel che, ayüucülequefuingün. Huelu pichiñma mu huesalcalerpui ti dungu.