18 KIMELTUN

Kelluchepe tami feypin

1 Korintio 9:⁠19-23

DUAMFALI TAMI KIMAL: Rakiduamelfinge pu allkütukelu, fey “rüf kelluenew ta tüfa” piayngün.

Ngüneduamnge chem kimniey pu allkütupelu. Re feypilayaymi ñi kimnieel pu allkütupelu. Doy may kellufinge engün ñi ngüneduamal kiñeke dungu ñi rakiduamkenofel engün.

Feypilmi kiñe kimngeelchi dungu, doy matu feypiafuymi tüfa. Welu kimngenole, doy ñochi kimeltulelafuymi.
Inaduamfinge fillke papel ka rakiduamkülenge tüfa mew. Pefilmi kiñe dungu rupalu newe chumül kam ñi müte kimnoel pu allkütukelu, kümeafuy tami feypial tüfa. Femngechi kimfalkünuafimi kiñe falin dungu. Welu küme rakiduamkülenge, femngechi tami chem pial nüwküleay ti kimeltun mu.

Petu ngüneduamülmi tami chem pial, ramtuwnge: “¿Chem? ¿Chumngelu? ¿Chemu? ¿Chew? ¿Chumül? ¿Iney? ¿Chumngechi?” ka kakelu femngechi ramtun. Fey kiñeke tüfa ramtuafuymi ka wiñoldungulelafuymi pu allkütukelu. Femngechi doy ayüfalngeay tami kimeltun.
Pengelnge chumngechi inangeafuy tami feypimeken. Kimeltulelfinge pu allkütukelu chumngechi inayafuy Biblia ñi ngülam tañi mongen mu. Feypiafuymi kiñe dungu ñi rupameken engün, fey pengelelafuymi chumngechi inayal ti ngülam tañi küme rakiduamal ka küme femal engün.