QUIMELTUN 60
Eluucülenge tami doi fülmanieafiel ta Jehová
Tami chillcatun Biblia meu fillque dungu quimürpuimi Jehová mu. Com tami quimürpuel mu, doi piuqueyerpufimi ta Jehová. Feimu, ¿hultucuimi chi tami mongen Jehová meu ca fautizahuimi? Ca petu femnolmi, ¿raquiduamcülepelaimi tami fautizahual? Huelu fautizahulmi rume, eluucüleaimi tami doi püramyeafiel ta Jehová. Feula inaduamafiyiñ chem chumafuimi tami doi hueniyeafiel ta Jehová.
1. ¿Chumngelu eluucüleaimi tami doi hueniyenieafiel ta Jehová?
Com taiñ nehuen meu eluucüleaiñ taiñ doi cüme hueniyeafiel ta Jehová. ¿Chumngelu? “Femngechi taiñ quiñe püle tripanoal tati cüme rüpü meu” ca püntütripanoal Jehová mu (Hebreos 2:1). ¿Chem quelluafeiñmu taiñ fentecünunoal taiñ nor piuqueyefiel ta Jehová? Rumel cüdauconcüleal amuldungun meu ca raquiduamal ca chem chumal taiñ doi cüdahuelafiel ta Jehová (papeltuaimi Filipenses 3:16). Taiñ cüdahuelquefiel ta Jehová trürümfalngelai chem cüdau mu rume, feimu rume ayühulqueiñmu (Salmo 84:10).
2. ¿Ca chem dungu mülei tami femal?
Epe dehui tami chillcatufiel tüfachi lifru, huelu petu mülehuei falinque dungu tami quimürpual. Biblia feipi: “Huengetupe tamün chumngechi chengen” (Efesios 4:23, 24). Amulele tami papeltuniefiel Biblia ca fentecünunolmi tami trahuluucülen, hueque dungu quimürpuaimi Jehová mu. Raquiduamnge chumngechi inayentuafuimi ta Jehová ca eluucülenge tami cüme elcünutual tami mongen, femngechi tami ayühulafiel ta Jehová.
3. ¿Chumngechi quelluaimu Jehová tami doi hueniyeafiel?
Biblia feipi: “Chau Ngünechen pepicayaimünmeu com dungu mu. Fei nehuentucuaimünmeu, yafültucuaimünmeu, quelluaimünmeu tamün cüme foliluucüleal reque” (1 Pedro 5:10). Com iñchiñ quintucaduamngequeiñ taiñ conal huesaque dungu meu, huelu Jehová nehuentucuqueiñmeu taiñ chaftual femngechi huesaque dungu (Salmo 139:23, 24). Cafei Jehová quelluaiñmu taiñ yafüluucüleal ca taiñ cüpa cüdahuelafiel (papeltuaimi Filipenses 2:13).
DOI QUIMAIMI
Ngüneduamaiñ chem chumafuimi tami doi hueniyeafiel ca cüdahuelafiel ta Jehová. Ca peaiñ chumngechi cümelcayaiñmu.
4. Llellipunieafimi ta Jehová, eimi tami doi cüme hueni
Tami papeltufiel mu ta Biblia ca tami ngillatufiel mu ta Jehová eimi ta hueniyefimi. Fei amulelmi tami femngechi femün meu, ¿doi fülmanieafuimi ta Jehová?
Papeltuaiñ Salmo 62:8, ca ngüneduamaiñ tüfachi ramtun:
Tami doi cüme hueniyeafiel ta Jehová mülei tami cüme llellipuafiel. Fei, ¿chem chumafuimi tami doi cüme entual tami llellipun?
Papeltuaiñ Salmo 119:97, ca ngüneduamaiñ tüfachi ramtun:
Tami doi hueniyeafiel ta Jehová mülei tami papeltuafiel Biblia. Fei, ¿chem chumafuimi tami doi cümelcayaeteu tami papeltufiel Biblia?
¿Chumngechi doi cümelcayafeimu tami papeltufiel Biblia? Feula inaduamafiyiñ quiñeque ngülam tami quelluaeteu. Peaiñ ti VIDEO, ca ngüneduamaiñ tüfachi epu ramtun.
¿Chem ngülam feipingelu video mu eimi inayafuimi?
¿Chem dungu Biblia meu ayüafuimi tami doi quimal?
5. Eluunge tami doi cüdahuelafiel ta Jehová
Raquiduamnge chumngechi doi cüdahuelafuimi ta Jehová, femngechi doi cüme hueniyeafimi. Peaiñ ti VIDEO, ca ngüneduamaiñ tüfachi ramtun
¿Chumngechi quellueyu ta Cameron eluucüleal ñi doi cüdahuelafiel ta Jehová?
Com iñchiñ huiñamtuulayafuiñ ca mapu mu taiñ amuldungual. Pepi amunoliyiñ rume ca mapu taiñ amuldungual, raquiduamafuiñ chumngechi doi cüdahuelafiel ta Jehová. Papeltuaiñ Proverbios 21:5, ca ngüneduamaiñ tüfachi epu ramtun:
¿Chumafuimi tami doi cüdahuelafiel ta Jehová trahunche mu?
¿Chumafuimi tami doi cüdahuelafiel ta Jehová amuldungun meu?
Ñi feipin Proverbios 21:5, ¿chumngechi quelluafeimu tami doi cüdahuelafiel ta Jehová?
Fillque dungu tami femafel
Eluunge tami doi cüme llellipuafiel ta Jehová.
Eluunge tami papeltuafiel com tati Biblia.
Quimürpufinge com pu peñi ca pu lamngen trahunche mu.
Quintunge quiñe che tami quimeltulelafiel Biblia.
Precursor regular cam auxiliar ngerpuafuimi.
Huentrungelmi, eluunge tami elfalcünulelngeal tami quelluafiel pu loncolelu.
6. Rumel ayüucüleaimi
Papeltuaiñ Salmo 22:26, ca ngüneduamaiñ tüfachi ramtun:
¿Chem mülei tami femal tami ayüucüleal feula ca rumel mu?
TAMI QUIMEL
Yafüluucülenge tami doi hueniyeafiel ta Jehová ca tami doi cüdahuelafiel, femngechi rumel ayüucüleaimi.
¿Chem piafuimi?
Jehová quelluaimu tami cüdahuelafiel, ¿chumngelu maneluhuafuimi tüfa meu?
¿Chem chumafuimi tami doi hueniyeafiel ta Jehová?
Tami doi fülmanieafiel ta Jehová, ¿chumngelu eluucüleaimi tami doi cüdahuelafiel?
CA PEAFUIMI
Jehová, ¿chem dungu falintufi: Quiñe rupa taiñ fütra poyeafiel cam taiñ poyeafiel com taiñ mongen meu?
Quiñe che nor piuqueyefilu rume ta Jehová, ayüucülehuerpulayafui. ¿Chem quelluafeyu tañi huiño ayüucülerputual? Pefinge ti video.
¿Chem quelluafeiñmu taiñ doi cüdahuelafiel ta Jehová?
“Taiñ püramyeafiel ta Jehová, raquiduamaiñ chumngechi doi cüdahuelafiel” (Ti Huerquen 15 mayo, 2004)
Pefinge chumngelu falin-ngei tami cüme hueniyeafiel ta Jehová ca chumngechi eimi cüme hueniyeafuimi.
“Jehová ñi antü püllelepai: Eluhuaiñ taiñ doi cüme hueniyeafiel” (Ti Huerquen 15 mayo, 2009)