Tañi mongen doi huesa amulefui

TAÑI CUIFI MONGEN:

Tremün quiñe pofrengechi lof mu, mülelu Los Ángeles huaria mu, Estados Unidos. Cheu tañi choyüngen, mülefui droga ca pandilla. Niefun cüla peñi ca epu lamngen, inan-ngen tañi hunen peñi mu.

Pichicalu iñche, tañi ñuque yequefeneu iglesia evangelica mu. Huechengelu, femquelafun tañi quimeltungeel. Epu rume raquiduam niequefun. Domingo mu ülcantuqueiñ quiñe coro iglesia mu. Amulan iglesia mu, fei fiestatuquen, drogatuquen ca cudumdomoquen.

Lef illcurumequefun ca quehuafengefun. Chem rume nüquefun ñi quehuayal tañi pu caiñe. Tañi quimeltungeel iglesia mu müte quellulaeneu. “Chau Dios adnieneu ñi castigayafiel ti pu che” piquefun. Nielu iñche 18 tripantu, ayüfiñ quiñe trahunche conquelu politico dungu mu, incañpequefi cutrancauquechi pu che. Colegio mu conün quiñe trahunche mu ca femngechi raquiduam niequelu. Fentren rupa protestaiñ, feimu cerrangeafui chi colegio pichiñma mu.

Iñche rume quehuafengefulu am, feimu tati protesta pichin dungu troquiquefiñ. Üdechequefun, feimu confun doi huesaque dungu mu. Quiñe chi, tañi pu hueni iñchiñ pemefiyiñ quiñe pelicula. Fei mu pengelngei tati pu esclavo tuhun-ngelu África mapu mu rume cutrancahuingün Estados Unidos mapu mu. Tati pelicula rume illculcaeiñmu. Feimu cine mu pefiyiñ flangque che, hulelcafiyiñ. Quintumequeiñ cheu ñi mülen flangque che, fei hulelcaquefiyiñ.

Feichi antü püle, iñche ca tañi pu peñi rume quehuachequeiñ. Fentren rupa pu soltau inantucuqueiñmeu. Quiñe tañi peñi conquefui quiñe pandilla mu, rume huesaque che ngefuingün. Iñche trahuluuquefun quisu engün mu. Tañi mongen doi huesa amulefui.

TI BIBLIA CÜME ELCÜNUTUENEU ÑI MONGEN:

Iñche niefun quiñe hueni, tañi pu chau Dunguquelu Inei Ngen Jehová ngeingün. Mangeleneu ñi amual trahun mu. Amun iñche, fei ngüneduamün ñi cüme mongen yenien engün. Trahun mu com niequeingün tañi Biblia ca papeltuquefingün. Ca tati pu huechequeche, huechengeafui rume, hulquei hueupin. Quimlu iñche Chau Dios ñi Jehová pingen, ülalehuei tañi hun, “ahuem” pin. Com üituquefingün ta Chau Dios (Salmo 83:18). Quimfali fill tuhun nien engün, huelu com quiñeucüleingün.

Ellaca mu, iñche pilafun tañi quimeltungeal Biblia. Huelu ayüquefun ñi amual trahun mu. Quiñe antü, iñche mülen trahun mu. Quiñeque tañi pu hueni amui concierto mu. Fei hueñeñmafingün tañi chaqueta cuero quiñe hueche. Hulelcafingün, fei langümfingün. Ca antü mallmahuingün ñi femün femngechi huesa dungu. Yengefui juicio mu engün, huelu mallmaucüleingün müten. Mülenagpualu carcel mu engün com ñi mongen. Ayühun ñi amunon langümngelu chi hueche. Feimu cüme dullin ñi papeltuafiel chi Biblia, fei ñi norcünutual ñi mongen.

Fentren rupa illamcangequefun. Feimu afmatulehuen tati pu Dunguquelu Inei Ngen Jehová fente tañi duamtuuquen ca tañi piuqueyehun. Quiñe antü quiñe curehuen flang che amui cañpüle, fei elfalcünui tañi pichiqueche curü che mu. Ca antü quiñe flang familia umalelfi quiñe curü hueche huentru tañi ruca mu. Tüfa pengeleneu pu Dunguquelu Inei Ngen Jehová ñi rüf piuqueyehun engün. Chumngechi ñi feipin Jesús: “Hueluconquechi piuqueyehulmün, com mapu meu mülechi pu che quimaingün iñche tañi discipulongen ta eimün” (Juan 13:35). Feimu quimürpun tati pu Dunguquelu Inei Ngen Jehová ñi rüf cristiano ngen engün.

Papeltulu Biblia iñche, quimtucurpun ñi norcünutual tañi mongen. Quimürpun ñi quehuatuyaunoal, ñi ñom piuquengeal. Ñochiquechi cüme elcünutun tañi mongen (Romanos 12:2). Enero 1974, fautizahun ñi Dunguquelu Inei Ngen Jehová ngerpual.

Deu fautizaulu iñche, cüdautulefun tañi illcufemnoal. Quiñe antü quimeltucheyahuiyiñ, fei pefiñ quiñe hueñefe yeñmaeteu ñi radio mülelu auto mu, inantucufiñ. Epe ditupufilu, ütrüfentucünutui tañi hueñen ti radio. Huiñotun cheu ñi quimeltucheyahun pu peñi pu lamngen, feipifiñ chumngechi ñi petun tañi radio. Quiñe peñi feipieneu: “Diturpufilmi ti hueñefe, nüfilmi, ¿chumafuimi?”. Feichi ramtun raquiduameleneu. Ngüneduamün tañi cüdaucüleal tañi ñom piuquengeal.

Octubre 1974 tripantu, hunelerpun amuldungun mu. Fei hula mangelngen tañi cüdaucülepual ti Betel mülelu Nueva York huaria mu. 1978 tripantu, huiñotun tañi tuhun huaria mu ñi dapiafiel tañi ñuque, cutrancülei. Rupalu epu tripantu, niehuiyu Aarhonda iñchiu. Fentre quellueneu tañi dapiafiel tañi ñuque, fei lai tañi ñuque. Fei hula mangelngeyu tañi amual tati Escuela de Galaad pingelu. Fei hula aflu chi escuela, mangelngeyu tayu misionero ngeal Panamá mapu meu. Petu müleyu Panamá mapu mu.

Deu tañi fautizahun, rume cüdautuquen tañi illcufemnoal. Feimu lelicangeli, tripaquen tañi huiño entunoal tañi lladcüquen. Cüme duam mu huiñoldunguquen. Fentren che ca tañi domo, “cümei tami lladcüfemquenon” piqueneu. Quiñeque mu iñche ca afmatulehuen tañi tüngcülen. Iñche feipilayafun quisutu ñom piuquengen, Biblia mu llemai doi ñom che ngetun (Hebreos 4:12).

CHEM CÜMELCAN LLOHUN:

Tañi papeltun Biblia, quimün chem chumal. Tüng chengen. Inei rume cüpafquelafiñ, huelu doi quelluquefiñ pu che ñi quimafiel ta Chau Dios. Quimeltulelfiñ Biblia quiñe cuifi caiñe. Deu tañi fautizahun, quiñentrür müleyu tayu ruca mu. Cuifi caiñeyeuquefeyu, huelu feula hueniyehuiyu. Petu huenihuencüleyu. Tañi domo iñchiu quelluquefiyu doi 80 pu che ñi poyeafiel ta Jehová.

Rume mañumquefiñ Chau Jehová tañi elueteu cüme mongen ca rüf ayühun. Fentren cümeque hueni nien.