Feula queta quelluquefiñ ta pu che

TAÑI CUIFI MONGEN:

Choyüngen Acul pingechi lof mu, mülelu huente huincul mu. Feitachi lof mülei Guatemala pingechi mapu mu. Iñche ñi tuhun ixil pingei. Pu ixil, pu mapuche reque femngeiñ Guatemala mapu mu. Quisu taiñ quehun niequeiñ, huelu ca quim huinca dungun. Petu tremlu iñche, rupamequefui quiñe fütra aucan Guatemala mapu mu. 36 tripantu alüñmai chi aucan. Fentren che iñche ñi tuhun-ngelu larpui.

Nielu iñche 4 tripantu, tañi peñi aucantumequefui quiñe bomba mu, fei paucürumei. Trefcütueneu chi bomba, feimu traumalehuen. Huelu tañi peñi 7 tripantu niefui müten, lai. Traumalehuelu iñche, huercüngen quiñe internado mu cheu ñi amuquen pu traumalelu. Fei quimürpun ñi papeltual chumngechi femquen pu trauma, braille pingei. Internado mu catrütungequefun ñi nütramcayal caquelu pichiqueche engün. Ca tañi pu compañ famentuquefeneu engün, feimu quisulequefun. Fill tripantu, 2 cüyen mülequefuyu tañi ñuque iñchiu. Fei rume piuqueyechefengefui, feimu rume ayüucülefun ñi trür müleal. Huelu 10 tripantu nielu iñche, lai tañi ñuque, ¡müna huesa! Fei müten piuqueyequefeneu, feimu rume huesa duamcülehuen.

Tañi hunen peñi quisu ñi familia niefui, mülequefui iñche tañi tuhun mapu mu. Feimu 11 tripantu nielu iñche, tripatun internado mu, fei müleputun tañi hunen peñi mu. Elungequefun com tañi duamnieel tañi mongeluhuam. Huelu inei no rume quellulaeneu tañi doi cüme duamtual. Quiñeque mu fente tañi huesa duamcülen, huirarelquefun ta Chau Ngünechen: “¿Chumngelu am ta lai tañi ñuque? ¿Chumngelu am ta traumalehuen?” piquefun. Pu che feipiqueneu: “Ngünechen ñi duam mu femngechi rupaqueimi”. Feimu, “Chau Dios norngelai ca piuqueyechequelai rume” piquefun. Ayülefun tañi langümuhual.

Tañi traumalen mu, pichi piuquengefun. Incañpeuquelafun ca dunguñpeuquelafun rume. Petu pichicalu iñche, fentren rupa nüntucangen. “Inei no rume duamnielaeneu” piquefun, feimu turpu feipilan ñi nüntucangen. Pu che müte nütramcaquelafeneu. Rume hueñancülequefun. Maneluuquelafun inei mu no rume, feimu ayülefun ñi quisuleal müten.

TI BIBLIA CÜME ELCÜNUTUENEU ÑI MONGEN:

13 tripantu nielu iñche, quiñe profesora rume cuñilleneu. Fei feipifi epu Dunguquelu Inei Ngen Jehová tañi pemeaeteu, fei nütramcameneu colegio mu. Fei engu feipieneu Biblia quimeltui ñi pelotual pu trauma ca ñi huiñomongetual pu layelu (Isaías 35:⁠5; Juan 5:⁠28, 29). Ayüquefiñ ñi nütram engu, huelu ñücüfcülequefun müten. Iñche müte nütramcachequelafun. Iñche yehuenchengefulu rume, nieleneu ta paciencia ca pengeleneu ñi piuqueyeteu. Amuleingu ñi quimeltuqueteu Biblia. Trecaquefuingu 10 kilometro huincul mu ñi puhual tañi ruca.

Tañi peñi feipieneu ti epu testigo pofrengefuingu, huelu cüme tucutuucüleingu. Fei engu elueneu pichique regalo, femngechi ngüneduamün fente tañi piuqueyenieteu. Rume eluucülefuingu tañi quellucheal, femngechi quimfali ñi rüf cristiano ngen engu.

Braille chillca mu, quimeltungequefun Biblia. Cüme allcütufun tachi chillcatun, huelu müte feyentulan quiñeque quimeltun. Müte feyentulafun ñi piuqueyeteu ta Dios cam tati pu che. Quimün chumngelu Chau Dios apümlafi tati cutrancahun, huelu müte pelafiñ poyen Chau reque.a

Doi amulelu ñi chillcatun Biblia, ñochiquechi doi feyenturpun. Quimürpun Dios tañi rume cutranpiuqueyechequen. Pefilu tañi pu poyequeteu ñi cutrancaumequen, Chau Dios feipi: “Iñche ngüneduamquefiñ tañi pu che ñi cutrancaumequen [...], cüme quimniefiñ ñi cutrancaucülen engün” (Éxodo 3:⁠7). Quimfilu iñche Jehová ñi cüme piuquengen, fei eluhun tañi serfiafiel. Feimu 1998 tripantu mu fautizahun, fei conelturpun Chau Dios ñi troquiñche mu.

Deu rupai quiñe tripantu tañi fautizahun, mangelngen ñi amual quiñe curso pu trauma ngealu Escuintla pingechi huaria mu. Fei quimfiñ quiñe loncolelu ca nütramcaquefiñ iñche tañi mülen huente huincul mu. Fei rume cüdautuquefun ñi amual trahun mu camapulelu am iñche tañi ruca. Fei quimlu tati loncolelu, quellueneu tañi mülenagal. Quintui quiñe familia tañi umalaeteu ca tañi yeaeteu trahun mu. Fachantü feichi familia petu quellunieneu quiñe fotüm reque.

Fentren cümeque dungu ñi femeteu pu peñi, pu lamngen niefun tañi lonco mu. Femngechi quimün ñi mülen fau ta rüfngechi cristiano (Juan 13:⁠34, 35).

CHEM CÜMELCAN LLOHUN:

Falinolu troquiuquefun cuifi, feula cüme amuletui ñi mongen. Nien maneluhun. Rüf ayüucületun. Raquiduamhuelan rume tañi traumalequen, tañi huesa rupaquen. Doi mai quelluquefiñ che ñi quimeltulelafiel Biblia. Loncocünungen chi trahunche mu ñi adnieafiel. Ca hueupimequen püllelechi trahunche mu ca hueupiquen fütraque trahun mu.

2010 tripantu mu, Jehová tañi troquiñche mangeleneu ñi amual tati Escuela de Entrenamiento Ministerial pingelu. Feula Escuela para Evangelizadores del Reino pingetui. Tüfachi escuela doi cüme quelluqueneu ñi quelluafiel tañi pu peñi ca lamngen. Amulu iñche feichi escuela mu, ngüneduamün fente ñi falintuqueteu ca piuqueyenieteu Jehová. Chau Jehová eluquefi inei rume ñi femal tañi cüdau.

Jesús feipi: “Doi cümei ta hulal ta llohun meu” (Hechos 20:⁠35). Feula rüf ayüucülen. Cuifi raquiduamlafun rume, huelu feula rüf quelluquefiñ ta che.