Kiñe yewün trürümfalngenolu

JORDAN niey kiñe sacapunta kiñe pichi farku kechilelu. Kiñe pekan sacapunta trokingeafuy, welu Jordan rume falintukefi. Kidu feypi: “Tañi pu che ñi weni, Russell pingelu, eluenew pichi wentrungelu iñche”. Lalu Russell, Jordan kimi chumngechi kidu ñi yafültukufiel tañi pu che rupalu wedake dungu mu, feymu rume falintueyew engün. Jordan feypi: “Doy kimfilu ta Russell, doy falintufiñ tüfachi pichi yewün”.

Tüfa pengeli, kiñeke che falintulayafuy kiñe yewün, welu ti mañumtuchefengelu rume falintuafi, trürümfalngenolu trokiafuy. Biblia pengeli kiñe doy fütra yewün rume falin-ngelu: “Ngünechen am rume piwkeyefilu ta kom mapu mew mülechi pu che, feymew wüli ñi kiñen Fotüm femngechi kom tati feyentulu kisu mew chumkawnorume ñi lanoael, welu may ñi nieael ta rumel mongen” (Juan 3:16).

¡Tüfachi yewün wülkey afnoachi mongen! Ngelay kangelu yewün doy falin-ngelu. Kiñeke falintukelafingün, welu pu rüf kristiano rume falintukefingün (Salmo 49:8; 1 Pedro 1:18, 19). Welu, ¿chumngelu (chemu) Chaw Ngünechen wüli tañi Fotüm kiñe yewün reke?

Ti apostol Pablo feypi: ‘Kiñe wentru mew müten müley ta kulpan mapu mew ka femngechi müley ta lan dungu. Fey tati lan dungu müley itrokom che mew’ (Romanu 5:12). Ti wünen wentru Adan, dulli (ngümintuy) ñi kulpayal, allkütulafi ta Chaw Ngünechen, feymu mülefuy ñi layal. Kom tuwiyiñ Adan mew, feymu kidu ñi femün mu, kom lakeiñ.

‘Tati kulpan ñi wülkeel re lan dungu müten, welu Ngünechen wülkey tati rumel mongen, Cristo Jesus mew’ (Romanu 6:23). Chaw Dios werküfi tañi Fotüm Jesukristo Mapu mew, ñi wülal tañi mongen nienolu kulpan, taiñ montulaetew lan mu. Feymu, tüfachi montulchen mu, kom pu mupiltulu Jesus mew nieayngün afnoachi mongen (Romanu 3:24).

Pablo nütramkalu ti kümeke dungu Chaw Dios ñi wülkeel Jesus mew, feypi: “¡Mañumtuafiyiñ ta Ngünechen taiñ femngechi füreneetew mew! ¡Welu re dungun mew kimkelaiñ reke taiñ doy küme mañumtuafuel ta kisu!” (2 Korintio 9:15). May, re dungun mew feypilayafuiñ tunte ñi afmatufalngen Chaw Dios ñi elkünuel taiñ montulaetew. Chaw Ngünechen wülfi pu che fillke yewün, welu ¿chumngelu doy falin-ngey Jesus ñi lan ka chem dungu mu trürümfalngelay?a Ka, ¿chumngechi mañumtuafiyiñ? Kimafuymi Biblia ñi feypin küpalechi trokiñ mu.